काठमाडौं । देशभर अवैध लागूऔषधसहित युवाहरु पक्राउ परेका छन् । उनीहरुको साथबाट ठूलो परिमाणमा लागूऔषध फेला परेको छ ।
दुई युवकलाई प्रहरीले पक्राउ गरेको छ । पक्राउ पर्नेमा धनकुटा, महालक्ष्मी नगरपालिका १ बाट तेह्रथुम लालिगुराँस नगरपालिका २ बस्ने सुजित भण्डारी सहित दुई जना छन् । उनहिरुलाई अवैध लागूऔषध गाँजा करिब एक केजी सहित २४ साउनको दिउँसो प्रहरीले पक्राउ गरेको हो । प्रहरी चौकी मारेककटहरेबाट खटिएको प्रहरीले को.१७ प १०६० नम्बरको मोटरसाइकल जाँच गर्ने क्रममा उनीहरूलाई उक्त लागूऔषध सहित फेला पारी पक्राउ गरेको जनाएको छ ।
त्यस्तै, नेपालगंज उपमहानगरपालिका १६ जयसपुरबाट अवैध लागूऔषध ब्राउनसुगर ३.३ मिलीग्रामसहित सुर्खेत वीरेन्द्रनगर नगरपालिका १० खजुरा बस्ने भुबन बिक र १९ वर्षीय अशोक सोनीलाई २४ साउनको राति प्रहरीले पक्राउ गरेको छ । सीमा प्रहरी चौकी जयसपुर र लागूऔषध नियन्त्रण ब्यूरो नेपालगंजबाट संयुक्त रुपमा खटिएको प्रहरीले रुपैडियाबाट नेपालगंजतर्फ आउँदै गरेका उनीहरुलाई उक्त लागूऔषध सहित फेला पारी पक्राउ गरेको प्रहरीले जनाएको छ ।
त्यसैगरी नवलपरासी (पूर्व), कावासोती नगरपालिका १६ कोल्हुवा चोकबाट चितवन भरतपुर महानगरपालिका बस्ने अर्जुनकुमार क्षेत्रीलाई नियन्त्रित लागूऔषध डाइजेपाम २५ एम्पुल, नुर्फिन २५ एम्पुल र फेनारगन २५ एम्पुलसहित २४ साउनको राति प्रहरीले पक्राउ गरेको हो । जिल्ला प्रहरी कार्यालयबाट खटिएको प्रहरीले म.१ ख.८११ नम्बरको बस जाँच गर्ने क्रममा उक्त परिमाणको लागूऔषध सहित फेला पारी पक्राउ गरेको जनाएको छ ।
नवलपरासी (पूर्व), मध्यबिन्दु नगरपालिका ८ फुलबारीबाट नियन्त्रित लागूऔषध डाइजेपाम २ सय ५८ एम्पुल, नुर्फिन २ सय ५८ एम्पुल र फेनारगन २ सय ५८ एम्पुल सहित कास्की लेखनाथ नगरपालिका १८ बस्ने कृष्ण गुरुङलाई २५ साउनको बिहान प्रहरीले पक्राउ गरेको हो । जिल्ला प्रहरी कार्यालयबाट खटिएको प्रहरीले भैरहवाबाट पोखरातर्फ जाँदै गरेको ना.५ ख ८६९८ नम्बरको बसमा सवार उनलाई उक्त परिमाणको लागूऔषध सहित फेला पारी पक्राउ गरेको प्रहरीले जनाएको छ । घटनाका सम्बन्धमा स्थानीय प्रहरीले आवश्यक अनुसन्धान गरिरहेका जनाएको छ ।
