काठमाडौं । नेपाल प्रहरीले जुवातासविरुद्ध अभियान चलाइरहँदा अर्पाटमेन्ट देखि स्कुलभित्र जुवा खेल्ने सम्म पक्राउ परेका छन् । जुवाखालको स्थान र अवस्था देख्दा प्रहरी नै आश्चर्य पर्ने गरेको छ । होटल, रिसोर्टका अलावा घरमा समेत जुवा खेलिएको भेटिएको छ ।
यसपटक प्रहरीले महिलाहरु जुवा खेलिरहेको खालमा धावा बोलेको छ । जोरपाटीमा महिलाहरु जुवा खेलेको फेला परेको छ । जुवाखालमा पक्राउ पर्नेमा गोकर्णेश्वर नगरपालिका ५ जोरपाटीस्थित मिना लामासहित छन् । उनीसहित जनालाई नगद १९ हजार १ सय ५० रुपैयाँ र एक बुक तास सहित २९ साउनको साँझ प्रहरीले पक्राउ गरेको हो । विशेष सूचनाको आधारमा महानगरीय प्रहरी वृत्त बौद्धबाट खटिएको प्रहरीले उनीहरुलाई पक्राउ गरेको जनाएको छ ।
त्यसैगरी काठमाडौं महानगरपालिका ६ बौद्ध रामहिटीस्थित सोलुखुम्बु घर भएका निमा शेर्पाको हिमालयन शेर्पा किचनमा जुवातास खेलिरहेका शेर्पा समेत पाँच जनालाई एक बुक तास र नगद २ हजार ७ सय ९० रुपैयाँ सहित २९ साउनको साँझ प्रहरीले पक्राउ गरेको हो । महानगरीय प्रहरी प्रभाग कपनबाट खटिएको प्रहरीले उनीहरुलाई पक्राउ गरेको जनाएको छ । यस सम्बन्धमा प्रहरीले थप आवश्यक अनुसन्धान गरिरहेको बताएको छ ।
