काठमाडौं । रक्तचन्दनको तेल कारोबारीलाई प्रहरीले पक्राउ गरेको छ । पक्राउ पर्नेमा सिन्धुपाल्चोक मेलम्ची ईन्द्रावती गाउँपालिका-५ घर भएका जित बहादुर लामा, धादिङ धुनिबेशी नगरपालिका-३ घर भएका अच्यूत केसी र नुवाकोट वेलकोटगढी नगरपालिका-११ घर भएकासुजन पौडेल रहेका छन् । उनीहरुलाई महानगरपालिका-१६ नयाँबजारबाट अन्दाजी ४५ लिटर रक्तचन्दनको तेल सहित ४ भदौमा पक्राउ गरेको हो ।
अवैध रुपमा रक्तचन्दनको तेल कारोवार भइरहेको सूचनाको आधारमा महानगरीय प्रहरी वृत्त लैनचौरबाट खटिएको प्रहरीले जितबहादुर लामाको कोठा खानतलासी गर्दा प्लाष्टिकको बोराले बेरेर लुकाई छिपाई राखेको दुई वटा सिल्भरको गाग्रीमा रहेको तेल सहित उनीहरुलाई पक्राउ गरेको जनाएको छ । यस सम्बन्धमा प्रहरीले आवश्यक अनुसन्धान गरिरहेको बताएको छ ।
