काठमाडौं । डिउटीमा खटिएको प्रहरीलाई आर्थिक प्रलोभनमा पार्न खोज्नेलाई प्रहरीले पक्राउ गरेको छ । पक्राउ पर्नेमा काठमाडौं महानगरपालिका १९ दमाईटोल बस्ने दोलखा घर भएका राम खत्री रहेका छन् । उनलाई १८ भदोको राति प्रहरीले पक्राउ गरेको हो ।
काठमाडौं महानगरपालिका १५ स्थित डिउटीमा खटिएको प्रहरीलाई नगद आठ सय रुपैयाँ दिई आर्थिक प्रलोभनमा पार्न खोज्दा उनलाई पक्राउ गरेको प्रहरीले जनाएको छ ।
उक्त स्थानमा बा.४५ प ६३७३ नम्बरको स्कुटर जाँच गर्ने क्रममा चालक मनोज शाहीले हेलमेट नलगाएको र चालक अनुमतिपत्र समेत साथमा नभएकोले स्कुटरलाई नियन्त्रणमा लिई कार्यालयमा आउनु भनि पठाएकोमा उक्त स्कुटी लिनको लागि आएका खत्रीले डिउटीमा खटिएको प्रहरीलाई उक्त नगद दिन खोजेका थिए ।
यस सम्बन्धमा प्रहरीले आवश्यक अनुसन्धान गरिरहेको बताएको छ ।
