काठमाडौं,भदौ २३ । अवैध लागूऔषध सहित प्रहरीले दुई जनालाई पक्राउ गरेको छ । पक्राउ पर्नेमा चन्द्रागिरी नगरपालिका १२ मुखियागाउँ घर भएका विक्की रोक्का धादिङ किरानचोक घर भएकी राममाया तामाङ रहेका छन् । प्रहरीले रोक्कालाई चरेश २५ ग्राम र तामाङलाई चरेश ४० ग्राम सहित २१ भदौको साँझ पक्राउ गरेको हो ।
महानगरीय प्रहरी वृत्त थानकोटबाट खटिएको प्रहरीले उनीहरुलाई उक्त लागूऔषध सहित फेला पारी पक्राउ गरेको जनाएको छ ।
त्यसैगरी,पर्साको वीरगंज महानगरपालिका १६ रजतजयन्ती चोकबाट बारा जितपुर सिमरा उपमहानगरपालिका १७ बस्ने रमेश चौधरीलाई लागूऔषध नुर्फिन १७ एम्पुल, डाईजेपाम १७ एम्पुल, फेनारगन १७ एम्पुल र खैरो हेरोइन एक ग्राम सहित २१ भदौको दिउँसो प्रहरीले पक्राउ गरेको हो । भारतबाट नेपालतर्फ आउँदै गरेको लु.४८ प ५२६७ नम्बरको मोटरसाइकल जाँच गर्ने क्रममा लागूऔषध नियन्त्रण ब्यूरो पर्साबाट खटिएको प्रहरीले चौधरीलाई लागूऔषध सहित पक्राउ गरेको जनाएको छ ।
यस सम्बन्धमा प्रहरीले थप अनुसन्धान गरिरहेको बताएको छ ।
