पर्सा,भदौ २४ । नियन्त्रित लागूऔषध सहित प्रहरीले दुई जनालाई पक्राउ गरेको छ । पक्राउ पर्नेहरुमा काठमाडौं महानगरपालिका ६ बौद्ध बस्ने निरज खत्री र काठमाडौं महानगरपालिका ६ कपनटार बस्ने जिई तामाङ रहेका छन् । उनीहरुलाई वीरगंज महानगरपालिका १६ रजतजयन्ती चोकबाट नियन्त्रित लागूऔषध डाईजेपाम ५० एम्पुल, नुरफिन ५० एम्पुल र फेनारगन ५० एम्पुल सहित २३ भदौको दिउँसो प्रहरीले पक्राउ गरेको हो ।
प्रहरी चौकी ईर्नवाबाट खटिएको प्रहरीले भारतबाट नेपालतर्फ आउँदै गरेका उनीहरूलाई जाँच गर्ने क्रममा उक्त परिमाणको लागूऔषध सहित फेला पारी पक्राउ गरेको जनाएको छ ।
यस सम्बन्धमा स्थानीय प्रहरीले आवश्यक अनुसन्धान गरिरहेको बताएको छ ।
