रिपोर्टर्स नेपाल । रौतहट सुरक्षाका दृष्टिले निकै संवेदनशील जिल्ला मानिन्छ । त्यहाँ पुग्ने प्रमुख जिल्ला अधिकारी देखि प्रहरी प्रमुखहरु समेत जिल्लालाई निर्क संवेदनशील मान्छन् ।
संगठित अपराधका घटनाहरु बढी हुने जिल्लामध्ये हो रौतहट । भारतको विहारको मोतिहारी जिल्लासँग जोडिएको रौतहटबाट सीमापार सहज आवतजावत हुन्छ । सीमापार आपराधिक क्रियाकलापका कारण पनि यो जिल्ला संवेदनशील मानिन्छ । दुवैतर्फ हुने आपराधिक क्रियाकलापमा सीमापार सक्रिय आपराधिक गिरोहको संलग्नता देखिएको छ । यसको प्रमाण रौतहटमा घटेका ठूलो आपराधिक घटनामा संलग्नहरुको विवरणबाट जानकारी प्राप्त हुन्छ ।
रौतहटमा २०६३ र २०६३ मा दुईवटा ठूला घटना घटे । दर्जनौंको ज्यान जानेगरी भएका घटनामा सीमापार अपराध गर्नेहरुको संलग्नता देखिएको छ ।
७ चैत २०६३ मा गौर बजारमा भएको हत्याकाण्डमा सीमापारीबाट आएका अपराधीहरु समेत संलग्न भएको अनुसन्धानबाट पत्ता लागेको थियो । वर्तमान उपप्रधानमन्त्री उपेन्द्र यादव त्यतिबेला मधेशी जनअधिकार फोरमका अध्यक्ष थिए र उनी मुछिएको घटनामा सीमापार गरी आएका आपराधिक समूह संलग्न भएको तथ्य खुलेको थियो ।
यसैगरी २७ चैत २०६४ मा राजपुरमा भएको सामूहिक हत्याकाण्डमा पनि सीमापार अपराधीहरु संलग्न रहेको तथ्य खुलेको छ । घटनामा बम ल्याउनेमध्ये भारतीय आपराधिक गिरोह थिए । उनीहरुमध्ये कतिपय दुर्घटनाबाट बम बिष्फोट भएपछि हत्या समेत गरिएका थिए । ती आपराधिक गिरोहका सदस्यका परिवार उनीहरुको खोजीकार्यका लागि रौतहट समेत आएका थिए । तर फेला परेन ।
रौतहटमा घटेका दुई घटनाबारे वृस्तृत विवरणः
घटना नम्बर १: गौर नरसंहार
७ चैत २०६३ मा रौतहटको गौर बजारमा नरसंहार भएको थियो । यो नरसंहारमा तत्कालिन मधेशी जनअधिकार फोरमका नेता उपेन्द्र यादवको निर्देशनमा भएको कतिपय अध्ययनहरुको निष्कर्ष छ । हाल देशको उपप्रधानमन्त्री बनेका यादव संलग्न भएको भनिएको घटनामा माओवादी कार्यकर्ताहरुको विभत्स हत्या भएको थियो ।
उक्त दिन अपरान्ह तत्कालिन मधेशी जनअधिकार फोरम र तत्कालिन नेकपामाओवादी निकट मधेशी राष्ट्रिय मोर्चाका बीच एकै स्थानमा कार्यक्रम गर्ने तय भयो । प्रशासनले सम्भावित झडपलाई दृष्टिगत गरी सुरक्षा व्यवस्था कडा पारेको थियो । कार्यक्रम जुधाएर गरिनुमा खतरनाक नियत लुकेको थियो ।
एउटै समयमा गौरमा कार्यक्रम गर्न लागियो । दुवै दलको मञ्च मात्र ६० मिटर दूरीको फरकमा बनाइएको थियो । फोरमको कार्यक्रमपछि माओवादीको कार्यक्रम गर्ने सहमति भएपनि फोरमका कार्यकर्ताले माओवादी निकट मेधशी राष्ट्रिय मुक्ति मोर्चाको मञ्च तोडफोड गरेका थिए । त्यसपछि फोरमको मञ्च माओवादी कार्यकर्ताले तोडफोड गर्न थाले । त्यसक्रममा हवाइ फायर भयो ।
घटनामा भागदौड मच्चियो । गोली चल्यो । पाँच जना माओवादी कार्यकर्ता घटनास्थलमा मारिए । घाइतेमाथि विभत्स तरिकाले थप आक्रमण गरियो । प्रतिमा खातुनलाई फोरम कार्यकर्ताहरुले जर्बजस्ती गरेर आगो लगाई हत्या गरे । भागेर ज्यान जोगाएका कतियलाई सर्लाहीतर्फ भाग्दै गर्दा नियन्त्रणमा लिई नृशंश तरिकाले हत्या गरियो ।
रेखा परियार, उषा थापा र सरस्वती उप्रेतीमाथि जर्बजस्ती गरी विभत्स तरिकाले जिउँदै आगो लगाएर मारियो अनुनय विनय गर्नेहरुलाई आगो लगाएर जिउँदै जलाएर मारियो । घरमा लुकेर बसेकालाई थुतेर विभत्स तरिकाले मारियो । रमाकान्त चौधरीलाई फोरम कार्यकर्ताको एउटा समूहले हत्या गरी फालिदिएका थिए । कतिपयलाई घिसारी घिसारी मारियो ।
हत्या गर्दा लाठी, भाटा, भालालगायतका घरेलु धारिलो हतियार प्रयोग भएको थियो । आगो लगाएर जिउँदै जलाउनेहरु पनि भए । सात किलोमिटर सम्म लखेटेर मारियो ।
यो घटनामा उपेन्द्र यादव मुख्य योजनाकार रहेको विभिन्न अनुसन्धान र अध्ययनले देखाएको छ । आपराधिक पृष्ठभूमिका बबन सिंहले सहयोगी भूमिका खेले । बबन प्रहरीको खोजीमा थिए । तर, भूमिगत अवस्थामै चुनाव लडेर स्वतन्त्र उम्मेदवारका रुपमा विजयी भएका थिए ।
ललन सिंह, चन्द्रीका सिंह, भुषण सिंह, अजय गुप्ता, बाबुलाल साह, गौरी शंकर, गगनदेव बैठा, शम्भु शाह, बलराम सिंह कुँवर, गणेशमान यादवलगायतमाथि आरोप लाग्यो ।
यो घटना नियोजित थियो भन्ने निष्कर्ष निकालिएको थियो । यो निकै बर्बर थियो । बलात्कार, महिलाको स्तन काट्ने देखि विभत्स तरिकाले हत्या भयो ।
(१५ जना पत्रकारहरुको टोलीले घटनाको स्थलगत अनुगमन गर्नुका साथै प्रत्यक्षदर्शीसँग कुराकानी गरेर तयार पारेको रिपोर्टमा आधारित)
घटना नम्बर २: रौतहट बमकाण्ड
रिपोर्टर्स नेपालले प्राप्त गरेको सूचना अनुसार नेपाली काँग्रेसका सांसद मोहम्मद अफताब आलम मुछिएको १२ वर्ष अघिको रौतहट बमकाण्डको प्रमाण एकै रातमा मेटिएको थियो । २७ चैत २०६४ मा बम राखिएको गोठमा घटना घटेपछि रातभरमा प्रमाण नष्ट गर्न लगाइएको थियो ।
घटनास्थल रहेको छाप्रोमा रहेका सबै प्रमाण मेटाइएको थियो । रगतको टाटा सबै छोप्न पोतिएको थियो । घटनापछि न्याय माग्दै काठमाडौं आइपुगेकी रोक्शाना खातुनले विष्फोट भएको गोठ तत्काल मर्मत गरिसकिएको बताएकी थिइन् । २०६५ वैशाखमा रिपोर्टर्स क्लबमा आएर उनले भनेकी थिइन्, छानविन गर्ने हो भने गोठमा पुगेको क्षति छोप्न टालिएको अझै देखिन्छ ।
घटना खुल्ने भयले गोठ नष्ट गरिएन । बरु क्षति टालियो । तर, टालिएको क्षति रौतहटका तत्कालिन सीडिओ र प्रहरी प्रमुखले देखेनन् । उनीहरुले आँखामा पट्टी हाले । घटनापछि प्रहरीमा उजूरी गर्न जांदा प्रहरीले बेवास्ता गरेको थियो । ९ वैशाखमा उजूरी गर्न जाँदा प्रहरीले दर्ता गर्न नमानेको श्रीनारायणले बताएका थिए ।
घाइतेलाई जिउँदै ईँट्टा भट्टामा हालिएको थियो । त्यसपछि त्यहाँ रहेका खरानीहरु सबै पुरिएको थियो । घटनाका प्रत्यक्षदर्शी सराजुल मोहम्मदले घटना लुकाउन गरिएको षड्यन्त्रको सनसनीपूर्ण खुलासा गरेका थिए ।
घटनाका प्रत्यक्षदर्शी सराजुलले घाइतेलाई अस्पताल लगौं भन्दा ईंट्टाभट्टामा हाल्ने भनेपछि त्यहाँबाट भागेका थिए । उनले आफ्नो पनि ज्यान जानसक्ने देखेर भागेको बताए ।
राजपुरको फर्दवा गाउँनै धूंवाले ढाकिने गरी भएको बम विष्फोटको घटना लुकाउन खोजिएको थियो । रौतहट क्षेत्र नं २ बाट पहिलो संविधानसभामा निर्वाचित मोहम्मद अफताव आलम स्वयं घटना लुकाउन सक्रिय रहेको पिडितको भनाई थियो । आफ्ना भाई महताफलाई खटाएर उनले पिडितलाई पैसाले किन्न खोजे । मृतक ओसे अख्तरका बाबु जोबेर मियांले रिपोर्टर्स क्लब नेपालमा भनेका थिए,‘हामीलाई तीन लाख रुपियां दिन्छु चुप लाग भनिरहेका छन् ।’
तर, आलम र उनका भाई मोहम्मद सकिल अख्तरले घटना नै नघटेको दाबी गरेका छन् । रौतहटमा त्यस दिन कुनै बम बिष्फोट नभएको दाबी गरे । जबकि त्यस दिनको बिष्फोटले सिंगो रौतहट र आसपासका जिल्लामा समेत आवाज पुगेको थियो । बम बिष्फोटले सिंगो रौतहटवासी त्रसित भएको घटना नै नभएको अख्तरको दाबीले झन् शंका पैदा भएको छ । घटनामा मारिएकाहरुको न सास देखाउन सके न लास । उनीहरुबारे सोध्दा अफताबका भाई सकिलले थाहानभएको दाबी गरे ।
घटनाको सबै प्रमाण मेटेको र राजनीतिक प्रभावले घटनाको अनुसन्धान हुन नदिइएकाले पनि अफताबको परिवार कारबाहीमा नपर्नेमा ढुक्क छ । यसलाई राजनीतिक रंग दिन खोजिएको छ । यसमा २०६४ चैत्रमा बहालवाला प्रहरीहरुको समेत मिलेमतो देखिएको छ । घटनाको ढाकछोप गर्न स्वयं जिम्मेवारी प्रहरी अधिकारीहरु लागेको खुलिसकेको छ ।
घटनामा जो जो बोल्छन् उनीहरुलाई पैसाले प्रभावित पार्न खोजियो । श्रीनारायाण सिंहलाई फकाउन प्रहरीमा कार्यरत उनका आफन्तलाई खटाइएको थियो । क्षतिपूर्तिस्वरुप रकम दिने भनिएको थियो । तर पिडित पक्ष पैसाबाट नबिक्ने भन्दै घटनाको दोषीलाई कारबाही गरिछाड्न दृढ थियो ।
बम बिष्फोटपछि घाइते र मारिएका अन्यलाई चिम्नीभित्र हाल्ने समयमा केही गलत प्रवृत्तिका प्रहरी स्वयं संलग्न थियो भन्ने प्रत्यक्षदर्शीको भनाईलाई आधार मान्ने हो भने त्यतिबेला प्रहरीले उल्टै घटना लुकाउन मद्यत गरेको देखिन्छ । त्यतिबेला देशभर संविधान सभा चुनावको चहलपहल भइरहदा रौतहटको पचरुखी गाविसको छतावना गाउ“ शोकाकुल बनाउने घटना लुकाउन खोज्नेहरु उदांगिदै गयो । घटनामा मारिएकाहरुका आफन्त खोज्दै आइरहेपनि घटना लुकाउन खोजियो । यसका लागि प्रहरी प्रशासनको समेत दुरुपयोग गरिएको थियो । अहिले घटना उदांगिएको छ । अफताब आलम पक्राउ परेका छन् ।
File Photo
