इटहरी, पुस ११ । जबरजस्ती करणीको आरोप लागेका सुनसरी चतराका सिद्धबाबा भनिने कृष्णदास गिरीविरुद्ध प्रहरीले २५ दिने अनुस बिहीबार सरकारी वकिल कार्यालयमार्फत सुनसरी जिल्ला अदालतमा अभियोग–पत्र दर्ता गराएको छ। अभियोग–पत्रमा गिरीलाई जबरजस्ती करणीमा संलग्न रहेको दाबीसहित कारबाही तथा पीडितलाई क्षतिपूर्ति माग गरिएको छ।
अभियोग–पत्रमा गिरीलाई मुलुकी अपराध संहिता २०७४ को दफा २१९ को उपदफा १, २ र ३ को ङ बमोजिम कसुर पुष्टि भएकाले त्यही ऐनअनुसार जबरजस्ती करणीमा कारबाही गर्न माग गरिएको छ। यो ऐन २१९ को ३ ङ बमोजिम १८ वर्षमाथिकी महिलामाथि जबरजस्ती करणी भएको घटनामा सातदेखि १० वर्षसम्म कैद हुने उल्लेख छ। अभियोगपत्रमै मुलुकी अपराध संहिता २०७४ को दफा २२८ बमोजिम पीडितको शारीरिक र मानसिक क्षति भएकाले गिरीबाटै मनासिव क्षतिपूर्ति पनि दिलाउन माग गरिएको जिल्ला न्यायाधीवक्ता गोकुल निरौलाले बताए।
गिरीले जबरजस्ती करणी गरेर गल्ती गरेको स्वीकारेको टेलिफोन अडियो रेकर्ड नै मुख्य प्रमाण भएको निरौलाले बताए। पीडित महिलासँग गल्ती भएको स्वीकार गर्दै गिरीले रुँदै मुद्दा फिर्ता लिन दबाब दिएको अडियो सार्वजनिक भएकोमा उनले सुरुमा सो अडियो आफ्नो नभएको दाबी गरेका थिए। तर प्रहरीको विधि–विज्ञान प्रयोगशालाको डिजिटल ल्याबमा अडियो परीक्षण गर्दा गिरीको आवाजसँग ७६ प्रतिशत मिलेको पाइएको छ।नागरिक दैनिकबाट
