काठमाडौं, ९ माघ । द वाइरको अन्तवार्तामा बलिउडका भेट्रान कलाकार नसिरुद्धिन शाहले अर्का भेट्रान अनुपम खेरलाई मनोरोगी भने । खेरलाई भडुवा र त्यो उनको रगतमै भएको भनेपछि भिडियो भाइरल भयो ।
शाहले भनेका छन्, ‘उनी मनोरोगी हुन् र भडुवा हुन् । त्यो उनको रगतमा नै छ ।’ खेरलाई शाहले लगाएको आरोपले क्रियाप्रतिक्रिया आएपछि बुधबार उनले पनि भिडियो सार्वजनिक गरे । खेरले नसिरद्धिन शाहलाई निराशामा सिंगो जीवन बिताएको आरोप लगाए । उनले भने, ‘यति राम्रो कलाकार भइकन तपाईंले सिंगो जीवन निराशामा बिताउनुभएको छ ।’ शाहमाथि गलत पद्धार्थ सेवन गर्ने गरेको आरोप समेत लगाए । तर, उनले त्यो कुन पद्धार्थ हो खुलाएनन् । खेरले भने, ‘जुन पद्धार्थको सेवन गर्नुहुन्छ त्यसले तपाईंलाई सही र गलत नै थाहा हुन्न ।’
शाहले खेरको रगतमै भडुवा प्रवत्ति रहेको आरोप लगाएपछि त्यसको जवाफमा खेरले भने, मेरो रगतमा हिन्दुस्थान छ । यी दुई कलाकारको एक अर्कामाथिको आरोपको भिडियो अहिले भाइरल भएको छ ।
भारतमा सत्तारुढ भाजपाले नागरिकतासम्बन्धि नयाँ ऐन ल्याएपछि क्रियाप्रतिक्रिया भइरहेको छ । त्यसको विरोधमा आएकाहरुप्रति कलाकार समेत विभाजित छन् । अनुपम खेर भाजपाको कदमको पक्षमा छन् । उनी नागरिकता विधयेकको पक्षमा उभिएका छन् । नसिरुद्धिन शाह त्यसको विपक्षमा उभिएका छन् ।
