काठमाडौं, ५ चैत्र । सरकारले कोरोना भाइरसको जोखिमलाई दृष्टिगत गरी विभिन्न देशबाट यात्रा गर्नेलाई अबको डेढ महिना रोक लगाउने भएको छ । यात्रा बन्देज गरिएका देशहरुमा युरोपका सबै मुलुकहरु, पश्चिम एशियालगायत खाडी क्षेत्रका मुलुकहरु, इरान, टर्की, मलेशिया, दक्षिण कोरिया, जापानबाट आउने र ती मुलुकलाई ट्रान्जिट बनाई अन्य जुनसुकै मुलुकबाट आउने सबै यात्रु रहेको उल्लेख छ ।
उपप्रधानमन्त्री ईश्वर पोखरेलको सयोजकत्वमा गठित कोभिड १९ संक्रमण, रोकथाम तथा नियन्त्रण उच्चस्तरीय समन्वय समितिको बैठकले आज गरेको निर्णय शुक्रबार अर्थात् ७ चैत्र मध्यरातिबाट लागू हुनेछ । त्यसपछि यात्रा बन्देज गरिएका देशहरुबाट कोही पनि नेपाल प्रवेश गर्न पाउनेछैनन् । यो यात्रा बन्देज १७ वैशाखसम्म लागू हेनेछ ।
तर, कोरोनाको सबैभन्दा बढी संक्रमण देखिएको चीनबाट आउने यात्रीलाई भने बन्देज लगाइएको छैन । चीनमा सबैभन्दा पहिले कोरोना संक्रमण सन् २०१९ को अन्ततिर देखिएको थियो । नेपालमा कोरोना भाइरसको संक्रमित एकजना पनि चीनबाट फर्किएका विद्यार्थी थिए ।
