बेलायतका प्रधानमन्त्री बोरिस जोनसनमा सामेत कोरोना भाइरस (कोभिड–१९) को संक्रमण देखा परेको छ । बेलायती प्रधानमन्त्रीको कार्यालय १० डाउनिंग स्ट्रिटका अनुसार प्रधानमन्त्रीमा गरिएको कोरोना भाइरस परीक्षणमा नतिजा पोजिटिभ देखिएको हो ।
प्रधानमन्त्री जोनसनलाई माइल्ड लक्षणहरु देखा परेको र उनको स्वास्थ्य अवस्था सामान्य रहेको बताइएको छ । अब उनी १० डाउनिंग स्ट्रिटस्थित प्रधानमन्त्री निवासमै सेल्फ आइसोलेसनमा बस्नेछन् ।
इंग्ल्याण्डका चिफ मेडिकल अफिसर प्राध्यापक क्रिस ह्विटीको आग्रहमा प्रधानमन्त्रीको परिक्षण गरिंदा कोरोना संक्रमण पाइएको थियो। संक्रमण भएपनि यस संकटको समयमा प्रधानमन्त्री जोनसनले आफ्नो जिम्मेवारीबाट विश्राम नलिने उनको कार्यालयले जानकारी दिएको छ ।
बेलायतमा कोरोना संक्रमण आक्रामक रुपमा फैलिरहेको छ । हालसम्म यहाँ कोरोनाबाट ५७८ जनाको ज्यान गइसकेको छ भने संक्रमितको संख्या करिब १२ हजार पुगिसकेको छ ।
दुई दिनअघि बेलायती युवराज चाल्र्समा पनि कोरोना भाइरसको संक्रमण पाइएको थियो । हाल उनी स्कटल्याण्डस्थित आफ्नो निवासमा आइसोलेसनमा छन् ।अन्नपुर्णबाट
