Logo

नेपालमा कोरोना भाइरसः ९ माघ देखि १५ चैत्रसम्म



काठमाडौं, १५ चैत्र । नेपालमा कोरोना भाइरसको पहिलो संक्रमित ९ माघमा परीक्षणबाट पत्ता लागेको हो । चीनबाट आएका नेपाली विद्यार्थीमा संक्रमण भेटिएपछि उनको उपचारपछि निको भएको थियो ।

स्वास्थ्य मन्त्रालयका अनुसार हाल तीन व्यक्ति उपचार गराइरहेका छन् । ती मध्ये दुईजना टेकु अस्पतालको आइसोलेशन कक्षमा उपचाररत छन् । अर्का व्यक्ति धनगढीस्थित सेती प्रादेशिक अस्पतालमा उपचाररत छन् ।

दोस्रो संक्रमित १९ वर्षीया किशोरी हुन् । उनी फ्रान्सबाट नेपाल आएकी थिइन् । कतारको दोहा हुँदै नेपाल आएकी उनी परीक्षणका लागि टेकु अस्पताल पुगेकी थिइन् । उनलाई ९ चैत्रमा संक्रमण भएको खुलेको थियो । भियतनामकी आफ्नी रुममेटलाई कोरोना संक्रमण भएको जानकारी पाएपछि उनी परीक्षणका लागि पुगेका थिइन् ।

तेस्रो व्यक्तिलाई कोरोना भाइरसको संक्रमण भएको १२ चैत्रमा पुष्टि भएको हो । उनी ६ चैत्रमा दुबईबाट आएका थिए । वैदेशिक रोजगारीमा गएका उनी धादिङ स्थायी घर भएका ३२ वर्षीय पुरुष हुन् । शुक्रराज ट्रपिकल तथा सरुवा रोग अस्पतालमा १० चैत्रमा भर्ना भएका थिए । उनको परीक्षणको रिपोर्ट १२ चैत्रमा आउँदा संक्रमण भेटिएको स्वास्थ्य मन्त्रालयले जानकारी दिएको थियो ।

चौंथा संक्रमित धनगढीस्थित सेती अञ्चल अस्पतालमा उपचाररत छन् । ३४ वर्षीय ती पुरुष दुबईबाट ७ चैत्रमा अगाडि फर्किएका हुन् । उनी वैदेशिक रोजगारीका लागि दुबई गएका युवक दुबईबाट दिल्ली काठमाडौं, नेपालगञ्ज हवाई मार्गबाट र त्यहाँबाट सडक मार्गबाट ८ चैत्रमा कैलाली पुगेको बुझिएको छ ।

२२ पौषमा विश्वमा पहिलोपटक कोरोना भाइरसको संक्रमण पत्ता लागेको थियो । चीनको वुआनमा भाइरस पत्ता लागेपछि फैलन थालेको थियो । १६ माघमा विश्वव्यापी स्वास्थ्य आपतकाल घोषणा गरिएको थियो । २८ फागुनमा यसलाई विश्वव्यापी महामारीका रुपमा वर्गीकरण गरिएको थियो ।



प्रतिक्रिया दिनुहोस्