काठमाडौं, ३ वैशाख । सामाजिक सञ्जाल मार्फत अफवाह फैलाएको अभियोगमा एकजनालाई मंगलबार प्रहरीले पक्राउ गरेको छ । फेसबुक मार्फत अफवाह फैलाएको अभियोगमा घोराही उपमहानगरपालिकाका दिपक न्यौपाने पक्राउ परेका हुन् ।
दिपकले फेसबुक स्टाटसमा दाङमा पनि कोरोना भाइरस संक्रमित ब्यक्ति भेटिएको भनी तथ्यहीन तथा भ्रामक विवरण पोष्ट गरी जनमानसमा डर फैलाउने काम गरेको पाइएपश्चात जिल्ला प्रहरी कार्यालय दाङबाट खटिएको प्रहरीले उनलाई पक्राउ गरेको हो ।
त्यस्तै सुर्खेतमा सामाजिक सञ्जाल फेसबुक मार्फत अफवाह फैलाएको अभियोगमा वीरेन्द्रनगर नगरपालिका कालिन्चोकका धर्मराज आचार्यलाई मंगलबार बेलुका प्रहरीले पक्राउ गरेको छ । धर्मराजले फेसबुक स्टाटसमा सुर्खेतमा १ जना कोरोना संक्रमित ब्यक्ति देखिएको भनि तथ्यहीन र भ्रामक प्रचार गरी अफवाह फैलाई जनमानसमा डर त्रास फैलाउने काम गरेको पाइएपश्चात जिल्ला प्रहरी कार्यालय सुर्खेतबाट खटिएको प्रहरीले उनलाई पक्राउ गरेको हो ।
यस सम्बन्धमा स्थानीय प्रहरीले आवश्यक अनुसन्धान गरिरहेको जनाएको छ ।
