एजेन्सी, ५ वैशाख । अमेरिकामा बेरोजगार संख्या इतिहासमै सर्वाधिक २ करोड नाघेको छ । बेरोजगार भत्ताका लागि थप ५ लाखले आवेदन दिएपछि संख्या २ करोड नाघेको हो । कोरोना भाइरसको संक्रमित छ लाख नाघिसकेको छ भने ३५ हजार मानिसको मृत्यु भइसकेको छ । अमेरिकाका सबैजसो राज्यहरुले लकडाउन कडा पारेका छन् ।
तर, २ करोड २० लाख मानिसलाई परिवारका नाबालक सदस्यबाहेक प्रति महिना १२ सय डलर दिनुपर्ने भएपछि कोरोना भाइरसको महामारीका बाबजुद राष्ट्रपति डोनाल्ड ट्रम्प कठोर बनेका छन् । उनले लकडाउन खुकुलो बनाएर कामकाजमा मानिसहरुलाई सक्रिय बनाउन खोजेका छन् ।
ट्रम्पले कोरोना भाइरसको रोकथामका लागि कतिपय राज्यहरुमा भइरहेको लकडाउन र निषेध खुलाउन नयाँ निर्देशिका जारी गरेका हुन् । अमेरिका सधै खुल्ने देश भएको बताएका उनले बिहिबार नयाँ निर्देशिका सार्वजनिक गरेका हुन् ।
उनको नयाँ निर्देशिका अमेरिकाको आर्थिक गतिविधिलाई पुनः संचालनमा ल्याउन केन्द्रित छ । राज्यहरुलाई यो अनिवार्य नभएको तर सहयोगी भएको उल्लेख छ । ट्रम्पले नयाँ योजना अनुसार अमेरिकाका केही राज्यहरु आजैबाट खुल्ने जनाइएको छ । त्यसमा राज्यका गभर्नरहरु सहमत भइसकेको ट्रम्पले जनाएका छन् ।
सामाजिक दुरी कायम गरी रेष्टुरेन्टहरु पनि खोल्न पाउने निर्देशिकामा उल्लेख छ । निर्देशिकामा लकडाउन खोल्नुपर्ने अनिवार्य भने नबनाइएको सीएनएनले जनाएको छ ।
