काठमाडौं २० बैशाख । पशुपति क्षेत्रमा स्थापित माधवराज सुमार्गी स्मृति भवनमा आज ३६ औं दिनसम्म खाना वितरण जारी छ । कोरोना भाईरस (कोभिड १९) माहामारीले गर्दा नेपाल सरकारले लगाएको लकडाउनमा खानाबाट बन्चित मजदूरहरुलाई पशुपति क्षेत्र विकास कोष र नेपाल मानव धर्म सेवा समितिको संयुक्त आयोजनामा खाना वितरण गरिएको हो ।
पशुपति क्षेत्र विकास कोषका सदस्य सचिव प्रदिप ढकालले कोरोना भाईरसका महामारीले लागेको लकडाउनले घर जाना नपाएका, दैनिक ज्यालादारी गरी जिविकोपार्जनबाट बञ्चितभएकाहरु र पशुपतिक्षेत्रका साधु–सन्त भोकै रहेको अवस्थामा सेवा कार्यको महसुश गरियो र दैनिक विहान खाना खुवाउने व्यवस्था सुमार्गी भवनमा गरिएको जानकारी दिए । सदस्य सचिव
ढकाल भन्छन्– सहयोगी मनकारीहरुबाट (नाम सार्वजनिक गर्न नचाहनेहरु) एक जनाले चामल, एक जनाले दाल, एक जनाले तरकारी, एक जनाले ग्याँस, एक जनाले मरमशला, पानी सहयोग भएका छन् हामी लकडाउन अवधिभर यसै गरी खाना वितरण गरिरहने छौं ।
अहिले हिन्दूहरुको आरध्यदेव महादेव पशुपतिनाथको मन्दिर पूर्णरुपमा बन्द छ, भक्तजनहरुबाट कतिको दवाव आएको छ भन्ने सोधनी हुँदा ढकाल भन्छन्– हामीले कोरोनाले विश्वलाई आक्रान्त बनाईरहेको बेला विभिन्न माध्यमहरुबाट भक्तजनहरुलाई दर्शनका लागि नआईदिन आग्रह गरेका छौं, आउनुभएको पनि छैन तर
परापूर्वकालदेखि चल्दै आएको दैनिक नित्य पूजा भने रोकिएको छैन चलिरहन्छ ।
नेपाल मानव धर्म सेवा समितिका युवा सङ्गठनको केन्द्रीय संयोजक नविन कोईरालाका अनुसार पहिले १२ सय जनालाई खाना खुवाईरहेका थियौं, कति त घर गएहोलान् अहिले ६ सय जनालाई खुवाईरहेका छौं, सेवामा दैनिक १८ जना विजय चोक युवा क्लब र पशुपति सिर्जनशील युवा क्लबका स्वय सेवकहरुले सहयोगी भूमिका निर्वाह गरिरहेको छ ।
खाना खुवाउने सेवाकार्यमा पशुपति क्षेत्र विकास कोषका सदस्य सचिव डा. प्रदिप ढकाल, कार्यकारी निर्देशक डा. घनश्याम खतिवडा, परिषद सदस्य राजु खत्री, नेपाल मानव धर्म सेवा समितिका युवा सङ्गठनको केन्द्रीय संयोजक नविन कोईराला र सुमार्गी भवन सञ्चालक सुनिल वैद्य रहनु भएको छ । यो टिमले आवश्यक परिचालन, सञ्चालनको भूमिका निर्वाह गर्दै आएको छ ।
तस्विर : मुकुन्द कालिकोटे, रिपोर्टर्स नेपाल डटकम
