कास्की, ४ जेठ । घन प्रहार गरी हत्या गरेको अभियोगमा ४ जना शुक्रबार साँझ पक्राउ परेका छन् । घन प्रहार गरी हत्या गरेर शव गाडेको अभियोगमा ४ जनालाई प्रहरीले पक्राउ गरेको हो । पक्राउ पर्नेहरुमा पोखरा महानगरपालिकाका ज्ञान बहादुर परियार, सोही ठाउँ बस्ने २ जना किशोर र बाग्लुङका सागर परियार रहेका छन् ।
ज्ञान बहादुरले करिब १ महिना अगाडि सोही ठाउँ बस्ने २२ वर्षीय बिमल रानाभाटलाई घनले हानी हत्या गरेर आफ्नै घर पछाडि बारीको डिलमा गाडेको भन्ने सूचनाको आधारमा खटिएको प्रहरीले उनीहरु ४ जनालाई नियन्त्रणमा लिई सोधपुछ गरी शनिबार बिहान उत्खनन गरेर हेर्दा शव सडेको अवस्थामा फेला परेको हो । घटनाका विषयमा जिल्ला प्रहरी कार्यालय कास्कीले थप अनुसन्धान तथा कारवाही प्रक्रिया अगाडि बढाएको छ ।
