काठमाडौं, असार १२। स्वास्थ्य एवं जनसंख्या राज्यमन्त्री नवराज राउतले देशभरी मौसम परिवर्तन भई वर्षात सुरुभएकाले क्वारेन्टिन व्यवस्थापनमा थप चुनौती देखिएको बताएका छन् । उनले एकैपटक भारत लगायतका देशबाट नेपालीहरु भित्रने क्रम बढेकाले सुरुमै समस्याको रुपमा देखापरेको क्वारेन्टिनको व्यवस्थापनको समस्या अहिले बर्षाका कारण थप जटिल बनेको बताए ।
पत्रकार ऋषि धमलासँग कुरागर्दै राज्यमन्त्री राउतले केहि ठाउँमा अव्यवस्थित देखिएपनि धेरै ठाउँमा भनिए जस्तो भद्रगोल नभएको दावीसमेत गरे । उनले वर्षा लागेकोले समस्या छ र सुधार गर्ने प्रयासमा सरकार लागेको भन्दै विश्वस्वास्थ्य संगठन र स्वास्थ्य मन्त्रालयको मापदण्डअनुसार क्वारेन्टिन बनाउन नसकिएको स्विकार गरे ।
देशको क्षमता अनुसार जहाँ जस्तो स्रोत उपलब्ध छ त्यसैलाई व्यवस्थापन गरिरहेको र यसको जिम्मेवारी स्थानीय तहलाई दिएको उनको भनाइछ । स्थानीय तहलाई संघीय सरकारले व्यवस्थापनमा लागि आवश्यक रकम दिएको र यसैबाट स्कुल तथा कलेजका क्वारेन्टिन र आइसोलेसन बनाउनुपर्ने अवस्था आएको राउतले बताए ।
उनले भने,‘देशको अवस्था र परिस्थिति अनुसार गरेका छौं । त्यहाँ बसेका सवैले पनि सरकारको यो प्रयासलाई बुझ्नुपर्छ । कार्यविधि अनुसार काम गर्न सवै स्थानीय प्रशासनलाई निर्देशन दिएको छ । उहाँहरु खटिनुभएको छ । स्थानीय जनप्रतिनिधिहरु पनि दिनहुँ खटिनु भएको छ । केहि ठाउँमा देखिएको समस्या हलगर्ने प्रयासमा सरकार छ ।
