सिन्धुपाल्चोक, २६ असार । बुधबार मध्यरातमा बाह्रबीसे नगरपालिका–५ स्थित याल्मो खोलामा बाढी आउँदा दर्जन बढी घर संरचना ध्वस्त भएका छन् भने घटनामा परी दर्जनौं मानिसहरु हताहत भएका छन् ।
बिहीबार अबेरसम्म दुई जनाको शव फेला परेको छ । अन्य २० जना बेपत्ताको खोजीकार्य भइरहेको छ । मौसम प्रतिकूल भइरहेपछि बेपत्ताको खोजी तथा उद्धार गर्न कठिनाइ भएको छ । बिहीबार अबेरसम्ममा बाह्रबीसे नगरपालिका–५ जम्बुका २० वर्षीय निकेश बस्नेत र उनकी ३ वर्षीया छोरी नियोना बस्नेतको मात्र शव फेला परेको इलाका प्रहरी कार्यालयका प्रहरी निरीक्षक नवराज न्यौपानेले जानकारी दिनुभयो ।
बाढीमा परी बेपत्ता भएकाहरुको पहिचान भएको छ । जिल्ला प्रहरी कार्यालयका अनुसार बाह्रबीसे नगरपालिकाका १६ जना र भोटेकोसी गाउँपालिकाका ४ जना बेपत्ता भएका छन् ।
बेपत्ता हुनेहरुमा बाह्रबिसे—५ का भीमबहादुर वाइबा, चिनीमाया वाइबा, लीलामाया वाइबा, पासाङडोल्मा वाइबा, निमाडोल्मा वाइबा, लक्ष्मण वाइबा, सुनमाला वाइबा, जनकबहादुर वाइबा, सविना तामाङ, आकाश तामाङ, तोकबहादुर तामाङ, युक्तकुमार तामाङ, सुवेश तामाङ, सलिना तामाङ रहेका खबर आजको समाचारपत्रले प्रकाशन गरेको छ ।
