काठमाडौं, १२ साउन । अवैध लागूऔषध सहित २ जना पक्राउ परेका छन् । सप्तरी राजविराजबाट नियन्त्रित लागूऔषध १३ ट्याब्लेट स्पास्मो प्रोक्सिभन प्लस र एकसय एमएलको २ बोतल डाइलेक्स डिसिसहित २ जनालाई आइतबार प्रहरीले पक्राउ गरेको हो ।
पक्राउ पर्नेहरुमा बिष्णुपुर महेश प्रसाद यादव र राजविराज ७ का धिरेन्द्र कुमार साह रहेका छन् । वडा प्रहरी कार्यालय राजविराज सप्तरीबाट खटिएको गस्ती टोलीले बा.६२ प ३१३३ नम्बर मोटरसाइकल जाँच गर्ने क्रममा मोटरसाइकलमा सवार उनीहरुलाई उक्त परिमाणको लागूऔषध सहित फेला पारी पक्राउ गरेको जनाएको छ ।
यसैगरी दाङ तुलसीपुर दुधरासस्थित सडकबाट अवैध लागूऔषध ०.३४ मिलिग्राम ब्राउनसुगर र नियन्त्रित लागूऔषध ३० ट्याब्लेट ट्रामाडोल सहित घोराही बस्ने कृष्ण बिकलाई आइतबार दिउँसो प्रहरीले पक्राउ गरेको छ ।
बिकले लागूऔषध ब्राउनसुगर बिक्री बितरण गरिरहेको सूचनाको आधारमा ईलाका प्रहरी कार्यालय तुलसीपुर दाङबाट खटिएको प्रहरीले बिकलाई नियन्त्रणमा लिई शरिर तलासी गर्दा उक्त परिमाणको लागूऔषध फेला परेको बताएको छ ।
त्यस्तै कास्कीको पोखरा सृजना चोकबाट नियन्त्रित लागूऔषध २६ थान नुर्फिन, २६ थान डाईजेपाम र २६ थान फेनारगन सहित ३ जनालाई शुक्रबार प्रहरीले पक्राउ गरेको छ । पक्राउ पर्नेहरुमा पोखरा घर भएका नविन परियार, शिवजी तिवारी र दाङ तुलसीपुर घर भएका राज कुमार चौधरी रहेका छन् ।
पोखरा नजिक क्षेत्रमा लागूऔषध बेचबिखन हुँदै सूचनाको आधारमा जिल्ला प्रहरी कार्यालय कास्कीबाट खटिएको प्रहरीले उनीहरुलाई उक्त परिमाणको लागूऔषध सहित फेला पारी पक्राउ गरेको जनाएको छ । यस सम्बन्धमा स्थानीय प्रहरीले थप अनुसन्धान गरिरहेको बताएको छ ।
