बारा, १९ असोज । अवैध घरेलु मदिरा सहित २ जनालाई प्रहरीले पक्राउ गरेको छ । जितपुर सिमरा उपमहानगरपालिका स्थित सडकबाट करिब १ हजार लिटर अवैध घरेलु मदिरा सहित २ जना पक्राउ परेका हुन् ।
पक्राउ पर्नेहरुमा मकवानपुर हेटौंडा भिमसेन पुलामी तथा सोही उपमहानगरपालिका लक्ष्मण बल रहेका छन् । ईलाका प्रहरी कार्यालय जितपुरबाट खटिएको प्रहरीले हेटौंडाबाट वीरगंजतर्फ आउँदै गरेको ना. ख ५४०४ नम्बरको ट्रकलाई जाँच गर्ने क्रममा ट्रकभित्र लुकाई छिपाई राखेको उक्त मदिरा सहित फेला पारी उक्त ट्रक चालक पुलामी र सहचालक बललाई पक्राउ गरेको जनाएको छ ।
उनीहरुलाई बरामद मदिरा र ट्रक सहित आवश्यक कारवाहीको लागि आन्तरिक राजश्व कार्यालय सिमरा बारा पठाएको जिल्ला प्रहरी कार्यालय बाराले बताएको छ ।
