काभ्रेपलाञ्चोक, कार्तिक २३ । जिल्लाको पाँचखाल नगरपालिका क्षेत्रमा छ हजार जीर्ण विद्युत्पोल फेरिएका छन् । नगर र नेपाल विद्युत् प्राधिकरण पाँचखाल वितरण केन्द्रबीच गत वर्ष मङ्सिरमा काठका जीर्ण पोल हटाई विद्युत् लाइन सुधार गर्ने सम्झौता भएअनुसार विद्युत्पोल फेरिएको जनाइएको छ ।
पाँचखाल नगर क्षेत्रका आठ हजार जीर्ण पोलमध्ये छ हजार विद्युत्पोल फेरिएको केन्द्र प्रमुख मेघनाथ ढकालले बताउनुभयो । उहाँका अनुसार नगरसँग विद्युत् सुविधाबाट वञ्चित परिवारलाई लाइन विस्तार, जीर्ण पोल तथा विद्युतीय संरचना सुधार गर्ने सम्झौताअनुसार हाल भित्री शाखा लाइनसहित छ हजार पुराना पोल फेरी स्टिल तथा सिमेन्टका विद्युत्पोल फेरिएको हो । “पोल फेरी विद्युत् लाइनको स्तरोन्नतिसमेत गरिरहेका छौँ”, ढकालले भन्नुभयो ।
मुख्य लाइनका ३०० पुराना विद्युत्पोल फरिएको केन्द्रले जनाएको छ । कुनै समय विद्युत् जडानका लागि हरिया रुख र बाँस गाडेर घरघरमा विद्युत् लाइन पुर्याइएकाले हाल जीर्ण भई दुर्घटनाको जोखिमका कारण स्टिल र सिमेन्टका पोल फरिएको नगरप्रमुख महेश खरेलले बताउनुभयो । उहाँले भन्नुभयो, “पाँचखालमा विद्युत् लाइन स्तरोन्नतिसँगै विद्युत् सुविधाबाट वञ्चित परिवारलाई समेत लाइन विस्तार गर्दैछौँ ।” उहाँका अनुसार २०० विपन्न परिवारलाई निःशुल्क मिटर वितरण गरिएको छ ।
केन्द्रअन्तर्गतका चार स्थानीय तहका ७५ प्रतिशत जीर्ण विद्युत्पोल फेर्ने काम सकिएको जनाइएको छ । साथै पाँचखालमा केन्द्र स्थापनापछिको एक वर्षको अवधिमा चार स्थानीय तहमा विद्युत् चोरीमा संलग्न ४०० ग्राहकलाई कारवाही गरिएको छ । कारवाहीबाट रु १८ लाख जरिवाना असुल गरेको केन्द्र प्रमुख ढकालले बताउनुभयो । उहाँका अनुसार ७५० को विद्युत् लाइन काटिएको तथा एक हजार ५०० नयाँ ग्राहक थपिएका छन् ।
ढकालका अनुसार हुकिङ गरी विद्युत् प्रयोग गर्ने र मिटर बाइपास गरेकाको विद्युतीय सामग्री जफत गरिएको थियो । जफत सामग्री लिन आउँदा कुन क्षमतामा विद्युत् अपचलन गरेको हो सोहीअनुसार जरिवाना गरी पठाइने प्रावधान रहेको छ । राम्रो काम गरेकामा पाँचखाल केन्द्र रनेपालभरबाट उत्कृष्ट शाखाका रूपमा हालै सम्मानितसमेत भएको छ । रासस
