काठमाडौं,४ माघ । अवैध लागुऔषध सहित ४ जना पक्राउ परेका छन् । धरानबाट करिब १ किलो ५ सय ग्राम अवैध लागुऔषध गाँजा सहित धनकुटा सहिदभूमि खोकोका पूर्ण बहादुर विकलाई शुक्रबार दिउँसो प्रहरीले पक्राउ गरेको हो ।
प्रदेश प्रहरी कार्यालय विराटनगर र ईलाका प्रहरी कार्यालय धरानबाट संयुक्त रुपमा खटिएको प्रहरीले विकलाई उक्त गाँजा सहित फेला पारी पक्राउ गरेको जनाएको छ ।
त्यस्तै, नेपालगंज बाईपास रोडबाट करिब २५ ग्राम अवैध लागूऔषध ब्राउनसुगर सहित ३ जनालाई शुक्रबार राति प्रहरीले पक्राउ गरेको छ । पक्राउ पर्नेहरुमा बाँके नेपालगञ्जका २४ वर्षीय नसरुद्धिन राई, सोही ठाउँ बस्ने २५ वर्षीय मेराज कपडिया र भारत रुपैडिहा घर भएका १८ वर्षीय किशोर रहेका छन् ।
जिल्ला प्रहरी कार्यालय बाँके र लागूऔषध नियन्त्रण ब्यूरो नेपालगंजबाट संयुक्त रुपमा खटिएको प्रहरीले उनीहरुलाई उक्त ब्राउनसुगर सहित पक्राउ गरेको बताएको छ । यस सम्बन्धमा स्थानीय प्रहरीले आवश्यक अनुसन्धान गरिरहेको जनाएको छ ।
