काठमाडौं, २३ माघ । नेपाल कम्युनिस्ट पार्टीका उपाध्यक्ष वामदेव गौतमले आफूलाई पुष्पकमल दाहाल प्रचण्डले एकपटक प्रधानमन्त्री बनाउने बताएको खुलासा गरेका छन् । प्रचण्ड स्वयंले गुन तिर्नका लागि प्रधानमन्त्री बनाउने भनेको बताएका हुन् ।
‘प्रचण्डले मलाई भेट्दा धेरै गुन लगाउनुभएको छ त्यो तिर्न एकपटक त प्रधानमन्त्री बनाउँछु भन्नुभएको छ । तर, मैंले भनेको छु कि एकपटक प्रधानमन्त्री बनाएर त्यो गुन तिरिदैन,’ ऋषि धमलासँग प्राइम टाइम्स टेलिभिजनको जनता जान्न चाहन्छन्मा गौतमले भने ।
गौतमले प्रचण्डलाई बारम्बार गुन लगाएको बताए । आफ्नै कारणले प्रचण्ड शान्ति प्रक्रियामा आएको उनले सुनाए । ‘मेरै कारणले प्रचण्ड शान्ति प्रक्रियामा आउनुभयो । मैंले नै पार्टी एकता बनाउन प्रचण्डलाई मनाएको हुँ,’ गौतमले भने । प्रचण्डका २० औं मान्छेको ज्यान जोगाइदिएको खुलासा समेत गौतमले गरे ।
