काठमाडौं, २३ फागुन । दुई रात तीन दिन काठमाडौं बसाईंपछि नेपाल कम्युनिस्ट पार्टी विप्लव समूहका महासचिव नेत्रविक्रम चन्दले उपत्यका छाडेका छन् । उनले आज दिउँसो काठमाडौं छाडेर नवलपरासी प्रस्थान गरेको बुझिएको छ ।
विप्लव पार्टी कार्यक्रममा सक्रिय भएका छन् । उनी २४ फागुनमा १११ औं अन्तर्राष्ट्रिय श्रमिक महिला दिवसको अवसर पारेर कपिलवस्तुको शिवगढीमा आयोजना हुने अखिल नेपाल महिला संघ क्रान्तिकारीको सातौं राष्ट्रिय सम्मेलनलाई सम्बोधन गर्ने कार्यक्रम रहेको छ । त्यसका लागि उनी काठमाडौंबाट बाहिरिएका हुन् ।
शान्ति सम्झौताका लागि विप्लव शुक्रबार काठमाडौं आएका थिए । उनले तीन दिन महत्वपूर्ण राजनीतिक भेटघाट गरेका थिए ।
उनले प्रधानमन्त्री केपी शर्मा ओलीसँग बालुवाटारमा भेटेपछि राष्ट्रिय सभागृहमा आयोजित कार्यक्रममा भएको शान्ति सम्झौतामा सहभागिता जनाएका थिए । उनले गृहमन्त्री रामबहादुर थापा बादलसँग पनि भेटेका थिए ।
नख्खु कारागारमा पुगेर शनिबार पुगेर आफ्नो पार्टीका नेता हेमन्तप्रकाश ओली सुदर्शनसँग भेटेका थिए । विप्लवले पार्टीका काठमाडौंमा उपलब्ध केन्द्रीय सदस्यहरुसँग पनि भेटघाट गरेका थिए ।
विप्लवले नेकपा दाहाल नेपाल समूहका स्थायी कमिटी सदस्य समेत रहेका पूर्व सभामुख कृष्णबहादुर महरासँग पनि भेटेका थिए ।
विप्लवले आइतबार विहान चार कम्युनिस्ट घटकको संयुक्त रणनैतिक मोर्चाका नेताहरुसँग पनि भेटेका थिए । भेटमा क्रान्तिकारी माओवादीका महासचिव मोहन वैद्य किरण, सीपी गजुरेल, नेकपाका अध्यक्ष ऋषिराम कट्टेल र वैज्ञानिक समाजवादी कम्युनिस्ट पार्टीका नेता आहुतीसँग भेटेका थिए ।
