काठमाडौं, जेठ ४ । नेपाल प्रहरीले देशभरबाट अस्पताल प्रयोजनबाहेकमा प्रयोग हुँदै आएका करिब ९ हजार थान अक्सिजन सिलिन्डर संकलन गरेको छ । गृह मन्त्रालयको निर्देशनपछि प्रहरीले देशभर अस्पतालबाहेकका प्रयोजनमा प्रयोग हुँदै आइरहेका खाली तथा भरी सिलिन्डर गरी सोमबार साँझसम्म ८ हजार ९ सय ९ थान अक्सिजन सिलिन्डर संकलन गरेको हो ।
प्रहरी केन्द्रीय प्रवक्ता एसएसपी वसन्तबहादुर कुँवरका अनुसार २६ वैशाखयता सोमबार साँझसम्म देशभरबाट झन्डै ९ हजार अक्सिजन सिलिन्डर संकलन गरिएको छ । भरिएको अवस्थामा रहेका अस्पताल तथा खाली सिलिन्डर अक्सिजन उद्योगलाई दिइएको जानकारी उनले दिए ।
प्रहरीले संकलन गरेका अक्सिजन सिलिन्डरमध्ये भरिएको अवस्थामा रहेका अस्पताल र खाली अक्सिजन प्लान्ट रहेका उद्योगलाई हस्तान्तरण गर्दै आएको छ । ‘सोमबार साँझसम्म ९ हजार थान संकलन भयो,’ प्रहरी केन्द्रीय प्रवक्ता कुँवरले राजधानीसँग भने, ‘तीमध्ये ७ हजार ७ सय २६ थान वितरण गरिएको छ ।’
संकलित सिलिन्डर प्रहरीले सीसीएमसी, डीसीएमसी तथा जिल्ला प्रशासन कार्यालयसँगको समन्वयमा अस्पताललाई दिँदै आएको हो । संकलन गरिएकामध्ये १ हजार १ सय ८३ थान खाली सिलिन्डर हस्तान्तरण गर्न बाँकी रहेको र ती सिलिन्डर पनि अक्सिजन उद्योगलाई भर्न दिएर अस्पतालमा पठाइने प्रहरीले भनेको छ ।
प्रहरीले आवश्यकताभन्दा बढी अक्सिजन सिलिन्डर होल्ड गर्ने व्यक्ति, विभिन्न संघसंस्था तथा स्वास्थ्यबाहेक अन्य प्रयोजनमा प्रयोग गर्ने उद्देश्यले उद्योग, कलकारखाना, कवाडी, ग्यास वेल्डिङ, पसल तथा गोदाममा ‘स्टक’ गरिएका अक्सिजन सिलिन्डर संकलन गरिएको जनाएको छ ।
कोरोना संक्रमणको विषम परिस्थितिमा अन्य प्रयोजनका लागि स्टक गरिएको, विभिन्न कम्पनी, संघसंस्था तथा व्यक्तिसँग आवश्यकताभन्दा बढी सिलिन्डर रहेको पाइएको छ । ती सिलिन्डर उपलब्ध गराई सहयोग गर्न प्रहरीले आग्रह गर्दै आएको छ ।
कोरोना संक्रमण बढ्दै जाँदा देशभरका अस्पतालमा अक्सिजन अभाव हुन थालेपछि प्रहरीले अक्सिजन सिलिन्डर संकलन अभियान चलाउँदै आएको हो ।
गृह मन्त्रालयले केही दिनअघि गरेको ‘सर्कुलर’अनुसार प्रहरीले देशभरबाट अक्सिजन सिलिन्डर संकलन गर्दै कोभिड अस्पताल तथा प्लान्टलाई उपलब्ध गराइरहेको छ । राजधानी दैनिकबाट
