ताप्लेजुङ ५ जेठ: नेकपा (एमाले) का नेता तथा पूर्वमन्त्री योगेश भट्टराईको समन्वयमा जिल्ला अस्पताल ताप्लेजुङलाई स्वास्थ्यका सामग्री उपलब्ध भएको छ । कोभिड१९ को सङ्क्रमण रोकथाम तथा नियन्त्रणका लागि भट्टराईको समन्वयमा काठमाडौँबाट पठाइएको सामान आज जिल्ला अस्पतालमा आइपुगेको छ ।
विभिन्न सरकारी तथा गैरसरकारी सङ्घसंस्थाबाट उपलब्ध भएका केही थान अक्सिजन कन्सिनट्रेटर, मास्क, पिपिई, पञ्जा, सर्जिकल मास्क, सेफ्टी चस्मा र सेनिटाइजर प्राप्त भएको जिल्ला अस्पतालले जनाएको छ । थप एन्टिजेन किट र गुणस्तरीय पिपिई समेत सङ्कलन भइरहेको र सङ्कलन पछि जिल्ला अस्पताललाई पठाइने भट्टराईका स्वकीय सचिव प्रेम गुरागाईले जानकारी दिए ।
दुई दिनअघि कोभिड नियन्त्रण तथा रोकथामका सन्दर्भमा नेता भट्टराईले ताप्लेजुङका सरोकारवालाहरुसँग भर्चुअल छलफल गरेका थिए । छलफलका क्रममा त्यहाँका स्वास्थ्यकर्मीलगायतले अत्यावश्यक स्वास्थ्य सामग्रीको अभाव भएको जनाएका थिए । सोही क्रममा भट्टराईले सङ्क्रमण नियन्त्रणका लागि प्रदेश र केन्द्र सरकारसँग समन्वय गरी सहयोग गर्ने प्रतिवद्धता जनाएका थिए ।-रासस
