काठमाडौं, ३ साउन । नेकपा एमालेका उपाध्यक्ष बामदेव गौतम पनि प्रधानमन्त्री शेरबहादुर देउवालाई विश्वासको मत दिने पक्षमा उभिएका छन् । उनीनिकट सांसदहरुले देउवालाई आज विश्वासको मत दिने बुझिएको छ ।
पछिल्लो समय माधव नेपालसँग सहकार्यमा रहेका गौतमले केही सांसद विश्वासको मतको पक्षमा थपिदिएको बुझिएको छ । विश्वस्त स्रोतका अनुसार गौतमको साथले नेता नेपाल ढुक्क भएका थिए । त्यसपछि उनले भीम रावल र सुरेन्द्र पाण्डेको साथ नभएपनि फरक नपर्ने भनेका थिए ।
गौतमले कति सांसद जुटाए भन्नेबारे बुझ्दा ५ देखि ७ संख्या रहेको बुझिएको छ । ती को को हुन् आज विश्वासको मत दिंदा खुल्ने बुझिएको छ ।
देउवा सरकारमा बामदेव गौतम उपप्रधानमन्त्रीसहित गृह मन्त्री बन्ने सम्भावना बलियो रहेको छ । उनी आफू मन्त्री बन्ने अवस्था नरहे घनश्याम भुसाललाई बनाएर लाने पक्षमा रहेको बुझिएको छ ।
यसैगरी, गौतमकी पत्नी तुलसा थापा भने जापान छिन् । उनले फर्किएपछि माधव नेपाल समूहमा रहने घोषणा गर्ने बुझिएको छ । आजको मतदानमा उनी सहभागी हुने छैनन् ।
