काठमाडौं, २२ साउन । नेकपा (एमाले) का वरिष्ठ नेता माधव कुमार नेपाल पक्षको केन्द्रीय कमिटी बैठक जारी छ । हिजोदेखि सुरु भएको बैठक आजपनि जारी छ । बैठकमा पार्टी एकतामा जाने कि विभाजन रोज्ने भनेर दुईथरी विचार आएका छन् । कतिपय नेताले भने एमालेमै संघर्ष गरेर अघि बढ्नुपर्ने पनि धारणा राखेका छन् ।
वरिष्ठ नेता नेपाल भने आफूहरुले एकताको लागि गम्भीर पहल गरेको भएपनि अध्यक्ष केपी शर्मा ओलीले जहिलेपनि छलछाम र धोकाधडीको राजनीति गरेको गुनासो पोखेका छन् । हिजो बैठकको सुरुवातमा सम्बोधन गर्दै नेता नेपालले ओलीलाई विश्वास गर्न नसकिने धारणा राखेका थिए । पछिल्लो समय समान अधिकारसहित अध्यक्ष दिने प्रस्ताव पनि ओलीले नै गरेको र बाहिर मिडियामा भने आफूले माधव नेपाललाई अध्यक्ष बनाउने प्रस्ताव नगरेको भनेर अभिव्यक्ति दिएको विषयमा पनि हिजोको बैठकमा कुरा उठेको थियो ।
नेपाल पक्षले आफूहरुले अघि सारेका माग सम्बोधन भए एकताको लागि कुनै बाधा नभएको निश्कर्ष निकालेको छ । नेपाल पक्षधर नेता विरोध खतिवडाले त यही साउन २४ गते नै पार्टी एकता हुने वा विभाजन हुने भन्नेबारे टुँगो लाग्ने निश्कर्ष निकालेका छन् । नेपाल पक्षका अधिकांश सांसदहरु भने अब ओलीसँग मिल्न नसकिने निश्कर्षमा पुगेका छन् । कतिपय नेताले संसदीय दल र केन्द्रीय कमिटी दुवैमा आफूहरुको ४० प्रतिशत पुग्ने भनेर दाबी गरेपनि अवस्था त्यस्तो नरहेको एक नेताले बताएका छन् ।
ती नेताले माधव नेपालले पार्टी विभाजनको बाटो रोजे उनलाई केन्द्रीय कमिटीमा पनि ४० प्रतिशत संख्या पुर्याउन सक्ने अवस्था नभएको जिकिर गरे । उनले भने,‘माधव नेपाललाई केन्द्रीय कमिटीमा पनि ४० प्रतिशत पुर्याउन हम्मेहम्मे हुन्छ । पार्टी फुट्ने शर्तमा माधव कमरेड कमजोर हुनुहुन्छ ।’ उनले अब नेता नेपालसँग अध्यक्ष ओलीसँग सम्झौता गर्ने वा एमालेबाट चोईटिने यी दुई मध्ये एक मात्रै विकल्प रहेको टिप्पणी गरे ।
उता, नेपालनिकट सांसद मेटमणि चौधरीले भने आफूहरु पार्टी विभाजनको पक्षमा नरहेको जिकिर गरे । बरु, एमालेमै संघर्ष गरेर ओलीमुक्त एमाले बनाउने तयारी रहेको चौधरीको भनाई छ । उनले माधव नेपालसँग केन्द्रीय कमिटीमा करिब ६५ प्रतिशत र संसदीय दलमा ४० प्रतिशभन्दा बढि संख्या रहेको दाबी गरे । file photo
