काठमाडौं, ४ भदौ । नेकपा एमाले विभाजित भएपछि अर्को नयाँ समूह खडा भएको छ । माधव नेपाललाई पार्टी विभाजनमा साथ नदिएका हस्तीहरुले नयाँ समूह खडा गरेका हुन् ।
भीम रावलसहितको नयाँ समूह अध्यक्ष केपी शर्मा ओलीको विपक्षमा रहँदै आएका नेताहरु थिए । उनीहरुले माधव नेपालले नयाँ दल दर्ता गरेपछि पनि ओलीसँगको संघर्षलाई जारी राख्ने सन्देश दिएका छन् । समूहमा सुरेन्द्र पाण्डे, अष्टलक्ष्मी शाक्य, युवराज ज्ञवाली, घनश्याम भुसाल, भीम आचार्य, गोकर्ण बिष्ट, योगेश भट्टराई र रघुजी पन्त छन् ।
पाण्डे र पन्तबाहेक सबै नवौं महाधिवेशनमा निर्वाचित पदाधिकारी हुन् । उनीहरुको एमालेमा बलियो पकड छ । रावलसहितका नेताहरुले माधवकुमार नेपालसहित १४ नेतामाथि कारबाही फिर्ता लिन ओलीलाई आग्रह गर्दै वक्तव्य निकालेका छन् । माधव नेपाललाई पनि पार्टी दर्ता प्रक्रियाबाट पछि हट्न भनेका छन् ।
ओलीलाई भेटेरै नेताहरुले सहमतिको बिन्दु निकाल्न नेताहरुले आग्रह गरेका थिए । तर, ओली तयार भएनन् । अब उनीहरुले एमालेभित्र नयाँ संघर्षको थालनी गरेका छन् ।
भीम रावलसहितको समूहमा ३७ जना केन्द्रीय सदस्य रहेको बुझिएको छ । यो समूह अब ओलीविरुद्ध संघर्ष गर्ने लक्ष्यसहित बढेको छ । ओलीले लचकता प्रदर्शन नगरेर जर्बजस्ती बढ्न खोजे भीम रावलसहितको समूहले फेरि अर्को विद्रोह गर्ने रणनीति समेत तयार गरेको छ । एमालेबाट फुटेको नेकपा एमाले समाजवादीमा ५६ जना केन्द्रीय सदस्य गएपछि २०३ नवौं महाधिवेशनबाट बनेको केन्द्रीय कमिटिमध्येबाट १४७ बाँकी रहेको छ । ओली सहमतिमा नआए त्यसमध्येबाट पनि ३७ जनाले फेरि विद्रोह गरी पार्टी विभाजनसम्म जाने अवस्था आउनसक्ने देखिएको छ ।
अब ओलीलाई भदौ भरी भीम रावलसहितको समूहले सहमतिका लागि दबाब दिने रणनीति बनाएका छन् । उनले २ जेठ २०७५ को अवस्थामा पार्टी कमिटीलाई नल्याई विधान महाधिवेशन गरेर बढ्न खोजेमा रावलसहितको समूहले विद्रोह गर्ने बुझिएको छ ।
