जनकपुर, १६ भदौ । जनता समाजवादी पार्टीका १० सांसदले लोकतान्त्रिक समाजवादी पार्टी रोजेका छन् । आज प्रदेश निर्वाचन कार्यालय जनकपुरधाम पुगी उनीहरुले हस्ताक्षरसहित सनाखत गरेका हुन् ।
जसपाबाट अलग भई लोसपा निर्वाचन आयोगमा दर्ता भएको थियो । त्यसपछि राजनीतिक दलसम्बन्धी ऐन संशोधन गर्न ल्याइएको अध्यादेश बमोजिम २२ भदौभित्र पार्टी रोज्न सक्ने समय दिइएको छ ।
जसपाबाट आज १० जनाले लोसपा रोजेर सनाखत समेत गरेका छन् । अझै ४ जनाले सनाखत गर्ने बुझिएको छ । पूर्वमन्त्री जीतेन्द्र सोनल आफै सनाखतका लागि सक्रिय भए । तर, उनको आज सनाखत भएको छैन ।
जसपाका ५४ सांसदमध्ये अहिलेसम्म १० जनाले मात्र लोसपा रोजेका छन् । राजपा र समाजवादी पार्टी नेपाल एकीकरण भई लोसपा बनेको थियो । २०७४ सालको प्रदेश सभा निर्वाचनमा प्रदेश नम्बर २ मा समाजवादी पार्टीबाट २९ र राजपाबाट २५ सांसद विजयी भएका थिए । राजपाका आधा भन्दा बढी सांसद फर्कने देखिएको छ ।
लोसपामा बढीभन्दा बढी प्रदेश सांसद तान्न अध्यक्ष महन्थ ठाकुरसहितका नेताहरु जनकपुर पुगेका थिए । ठाकुरसहित राजेन्द्र महतो र शरतसिंह भण्डारीको विमानस्थलमा कार्यकर्ताले विशेष स्वागत गरेका थिए ।
जसपा छाडी लोसपा रोज्ने प्रदेश सांसद
परमेश्वर साह
सरिता साह
बाबुलाल साह
जानकीशरण साह
जयनुल राइन
अलका झा
बबिता कुमारी
निलम देवी भुमिहारिन
रमेश प्रसाद कुर्मी
गौरीनारायण साह
