काठमाडौं, १७ कात्तिक । मंसिरको दोस्रो साता हुने नेकपा एमालेको महाधिवेशनमा केपी शर्मा ओली अध्यक्षमा दोहोरिने निश्चित नै छ । माधवकुमार नेपालले एमाले छाडेपछि ओलीको पार्टीमा पकड झन् बढेको छ ।
ओलीको आलोचना गर्नेमा उपाध्यक्षहरु भीम रावल र अष्टलक्ष्मी शाक्यका अलावा उपमहासचिव घनश्याम भुसाल मात्र छन् । ओलीविरोधी समूहका अन्य नेताहरु पनि उनको खुलेर आलोचना गर्न सक्दैनन् ।
ओलीले माधव नेपालको साथ छाडेकामध्ये योगेश भट्टराईबाहेक कसैलाई महत्वपूर्ण जिम्मेवारी दिएका छैनन् । महाधिवेशन आयोजनाका लागि मूल व्यवस्थापन समितिको संयोजकमा बादल छन् । उपसमितिहरुमा योगेश भट्टराईबाहेक कोही पनि पूर्व माधव नेपाल समूहका छैनन् ।
अष्टलक्ष्मी शाक्य उपाध्यक्ष हुन् । तर, महाधिवेशनको मूल व्यवस्थापन समितिमा उनलाई सदस्यमा समिति पारिएको छ । यसबाट ओलीले एमालेको १०औं महाधिवेशनबाट पूर्वमाधव नेपाल समूहकालाई पाखा लगाउने संकेत गरिसकेका छन् ।
उपाध्यक्ष भीम रावललाई १० बुँदे कार्यान्वयनको कार्यदलमा काम गर्न नसकेको आरोप लगाइसकेका छन् । रावलसहितका नेताहरु ओलीलाई प्रधानमन्त्रीबाट हटाएर शेरबहादुर देउवालाई बनाउन राष्ट्रपति समक्ष दर्ता गरेको निवेदनका हस्ताक्षरकर्ता पनि हुन् । उनले त्यसकारण पनि उनीहरुलाई छानी छानी पेलिरहेका छन् । अब महाधिवेशनबाट पाखा लगाउने अवस्था निर्माण गर्दैछन् ।
अष्टलक्ष्मी शाक्य, अमृत बोहरा, युवराज ज्ञवाली, सुरेन्द्र पाण्डे, घनश्याम भुसाल, रघुजी पन्त जस्ता एमालेमा लामो संघर्ष गरेकाहरुलाई पाखा लगाउने गरी ओलीको तयारी देखिन्छ । माधव नेपालको साथ छाडेर एमालेमै रहेकामध्ये योगेश भट्टराईलाई जिम्मेवारी दिएको हिसाबले उनले केही साथ पाउने सम्भावना देखिन्छ । गोकर्ण बिष्ट जिम्मेवारीविहिन जस्तै भएका छन् ।
ओलीले चाहेको नतिजा महाधिवेशनमा आउने देखिएको छ । यसकारण पदाधिकारीमा ओलीको चाहना नभए माधव नेपालको साथ छाडेर एमालेमा रहेकाहरुले पनि जित्ने सम्भावना कम छ ।
विगतमा माधव नेपालनिकटमध्ये क कस्लाई ओलीले पदाधिकारी वा महत्वपूर्ण पदमा जिताउन साथ दिने हुन् ? चासोको विषय बनेको छ । एमाले स्रोतका अनुसार ओलीले योगेश भट्टराईलाई साथ दिने सम्भावना छ । सुरेन्द्र पाण्डे र गोकर्ण बिष्टले पनि साथ पाउन सक्छन् । बाँकीले साथ पाउने सम्भावना कमजोर रहेको बुझिएको छ ।
