एजेन्सी, १३ माघ। न्युजील्यान्डकी प्रधानमन्त्री जासिन्डा आर्डर्न चढेको भ्यानलाई कोरोना खोप विरोधीहरूले लखेटेको भिडियो सार्वजनिक भएको छ। देशमा कोरोनाको नयाँ भेरियन्ट ओमिक्रोन फैलिएपछि आर्डर्नले रोकथामका लागि नयाँ नियम लागू गरेकी छिन् । त्यसपछि खोप विरोधीहरूले उनलाई नाजी भनेका छन् । आर्डर्नलाई लखेटेको भिडियो दृश्य अन्लाइनमा शेयर भइरहेको छ । बे अफ आइल्यान्ड्समा उनको भ्यान सडकबाट तल जान बाध्य पारिएको थियो । अन्य गाडीमा आएकाहरूले उनलाई लाज लाग्दैन भनी सोधेका थिए ।
अघिल्लो शुक्रवार भएको घटनामा विरोधीहरूले हामी तिम्रो आज्ञा मान्दैनौं भन्दै आर्डर्न गाडीको पछिल्लो भागमा लुकेको आरोप लगाए । आर्डर्नलाई वुस्सी र नाजीका साथै अन्य अश्लील गाली समेत गरिएको थियो ।आर्डर्नले घटनाबाट आफूलाई खासै फरक नपरेको र सुरक्षाका विषयमा चिन्ता नलागेको पत्रकारहरूलाई बताइन् ।
