काठमाडौं, १० फागुन । नबिल बैंक र कम्युनिटी होमस्टे नेटवर्कबीच सम्झौता भएको छ । उद्यमशीलता विकास, दिगो पर्यटन, वित्तीय साक्षरता साथै वित्तीय पहुँच प्रबर्धन गर्ने उदेश्यले बैंकले कम्युनिटी होमस्टे नेटवर्कसँग सम्झौता गरेको हो ।
कम्युनिटी होमस्टे नेटवर्कको प्रधान कार्यालय दरवारमार्गमा गरिएको उक्त सम्झौतामा नबिल बैंकको तर्फबाट नायव प्रमुख कार्यकारी अधिकृत सुजित कुमार शाक्य र कम्युनिटी होमस्टे नेटवर्कको तर्फबाट अध्यक्ष शिव प्रसाद ढकालले हस्ताक्षर गरेका हुन् ।
नेपालले अवलम्बन गरेको संयुक्त राष्ट्र संघको दिगो विकास लक्ष्यलाई बैंकको तर्फबाट सहयोग गर्ने उद्येश्यका साथ नबिल बैंकले लिएको दिगो बैकिङको पहलमा यो सम्झौता कोशेढुंगा साबित हुने नायव प्रमुख कार्यकारी अधिकृत सुजित कुमार शाक्यले बताए । साथै यसले स्थानीय स्तरमा उद्यमशीलता विकास, आन्तरिक तथा बाह्य पर्यटन प्रबर्धन गर्दै दिगो आर्थिक तथा सामाजिक रुपान्तरणमा सहयोग गर्ने उनको भनाई छ ।
यस सम्झौताले कम्युनिटी होमस्टे नेटवर्कलाई आन्तरिक तथा अन्तरास्ट्रिय समुदायमा अझ बढि फैलाई देशको दिगो आर्थिक विकासमा सहयोग गर्ने कम्युनिटी होमस्टे नेटवर्कका अध्यक्ष शिव प्रसाद ढकालले बताए । उनका अनुसार,कम्युनिटी होमस्टे नेटवर्क एक सामाजिक उद्यम भएको र यसले नेपाको सामुदायिक होमस्टेहरूको नेटवर्कलाई प्रबर्धन गर्न सहयोग गरेको छ ।
नेपाल सरकारले अवलम्बन गरेको संयूक्त राष्ट्रसंघको दिगो विकासको लक्ष्यलाई सघाउन नबिल बैंकले २०७८ असार १५ गते धान दिवशको दिन दिगो बैंकिङ कार्यक्रमको सुरुवात गरेको हो । यस सम्झौता मार्फत उद्यमशीलता विकास र दिगो पर्यटन प्रबर्धनमा टेवा पुग्ने बैंकले आशा लिएको छ ।
