काठमाडौं, १६ चैत्र । नेपाली कांग्रेसका प्रभावशाली नेता तथा पूर्वमन्त्री रमेश लेखकले पार्टीले स्थानीय तहको निर्वाचनमा राम्रो नतिजा हाँसिल गर्ने बताएका छन् । उनले आफ्नो पार्टीले बहुसंख्यक ठाउँमा जित्ने पनि दाबी गरे ।
पार्टीले स्थानीय तहको निर्वाचनमा तालमेल गर्नेबारे सर्वसम्मत् रुपमा निर्णय गरेको लेखकले सुनाए । हिजो राति प्राइम टिभीबाट प्रसारण भएको जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले तालमेल पनि गर्ने तर अवस्था र आवश्यकत्ता हेरेर मात्रै गर्ने भन्ने निर्णय भएको स्पष्ट पारे ।
उनले स्थानीय तहको अवस्था तालमेल गर्न आवश्यक छैन भन्ने देखियो भने सोहीअनुसार निर्णय लिईने जनाए । तर, अवस्था तालमेल गर्ने खालको रहे त्यहीअनुसार गर्ने पनि निर्णय भएको उनको भनाई छ । अहिलेको पाँच दलीय गठबन्धन कसैको विरुद्धमा नभएको उनको जिकिर छ । बरु, संविधान जोगाउनको लागि नै यो गठबन्धन बनेको उनले स्पष्ट पारे ।
