काठमाडौं, ७ बैशाख । काठमाडौं महानगरपालिकाका मेयर विद्यासुन्दर शाक्यले आफूले यो पाँच वर्षको अवधिमा धेरै नै काम गरेको दाबी गरेका छन् । उनले आफ्नो कामबाट जनता सन्तुष्ट रहेको सुनाए ।
हिजो राति प्राइम टिभीबाट प्रसारण भएको जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले काठमाडौं महानगरवासीको हितको लागि धेरै नै काम गरेको सुनाए ।
उनले आफूले मेयरको जिम्मेवारी सम्हाल्नुअघि र अहिलेको काठमाडौं महानगरको अवस्था तुलना गरेर हेर्नपनि सुझाव दिए । उनले अहिले सामूदायिक विद्यालयको स्तरको पनि दिनप्रतिदिन सुधार भएको सुनाए । उनले आफूहरुले प्रदेश र संघीय सरकारको पनि जिम्मेवारी निर्वाह गरेको सुनाए ।
उनले आफू मेयर भएको एक सय दिनमा घोषणा गरेको १०१ काममध्ये सबै पूरा नभएपनि धेरै नै काम पूरा गरेको दाबी गरे । उनले काठमाडौं पहिलेको भन्दा धेरै नै सफा भएको जिकिर गरे । विगतभन्दा अहिले काठमाडौंको मुहार फेरिएको उनको भनाई छ । अहिले काठमाडौंका मुख्य सडक धुलोरहित भएको पनि उनको दाबी छ ।
