रोल्पा, २७ बैशाख । रोल्पामा सत्तारुढ दल नेपाली कांग्रेस र नेकपा माओवादी केन्द्रका कार्यकर्ताबीचको झडप रोकिएको छैन् । सोमबार आक्रमण गर्दा कांग्रेसका दुईजना कार्यकर्ता घाइते भएका छन् ।
माओवादीले गत शनिबार पनि कांग्रेसका कार्यकर्तामाथि निर्घात कुटपिट गरेका थिए । सोमबार माओवादीको आक्रमणबाट घाइते हुनेमा तरुण दलका वडाध्यक्ष मानबहादुर बुढा मगर र कमल बुढा रहेका छन् । माओवादीका कार्यकर्ताले कांग्रेसका कार्यकर्तालाई धारिलो हतियार खुकुरीले आक्रमण गरेको कांग्रेसको आरोप छ ।
घाइतेमध्ये मानबहादुरको अवस्था निकै गम्भिर रहेको र उनलाई थप उपचारको लागि बाँकेको कोहलपुर पठाएको हो । त्यस्तै अर्का घाइते कमलको भने स्थानीय स्वास्थ्य चौकीमा उपचार भइरहेको छ। सोमबार कांग्रेस र माओवादीले मित्रवत् प्रतिस्पर्धा गर्ने भन्दै संयुक्त विज्ञप्ती जारी गरेका थिए ।
