काठमाडौं, ९ जेठ । नेपाली कांग्रेसका उपसभापति धनराज गुरुङले गठबन्धनका कारण पार्टीले नमिठो स्वाद चाखेको बताएका छन् ।
हिजो राति प्राइम टाइम्स टेलिभिजनको ‘जनता जान्न चाहन्छन् कार्यक्रम’ का लागि पत्रकार ऋषि धमलासँग कुरा गर्दै नेता गुरुङले भने, “हिजो मैले गठबन्धन गर्न हुँदैन भनेकै हुँ । त्यसमा म सैद्धान्तिक रुपमा विचलित छैन । तर पार्टीको केन्द्रीय कार्यसमितिले गठबन्धन गरेर जाने भनेपछि मैले त्यसलाई स्वीकार गर्नैपर्छ । अहिले आएर पार्टी निर्णयभन्दा अघि कसले के भन्यो भन्नुको कुनै अर्थ छैन ।”
गठबन्धनका कारण ३० प्रतिशत मत बदर भएको पनि उनले औंल्याए । गुरुङले भने, “पक्कै पनि तालमेलले उत्साह पनि जगाएको छ । तालमेलका कारण नमिठो स्वाद पनि चाखेका छौं । त्यसमा नजरअन्दाज गर्नुहुँदैन । तालमेलका कारण ३० प्रतिशत मत बदर भएका छन् । गठबन्धन गरेको ठाउँमा हारेका छौं, एक्लै लडेको ठाउँमा जितेका छौं ।”
स्थानीय तह निर्वाचनको जस अपजस सभापति एवं प्रधानमन्त्री शेरबहादुर देउवाले पाउनु स्वाभाविक भएको पनि गुरुङको टिप्पणी छ । उनले भने, “हामीले अघिल्लो निर्वाचनमा पनि पहिलो जस अपजस पार्टी सभापतिले लिनुपर्छ र त्यसपछिको जिम्मा हामी लिन तयार छौं भन्दै आएकै हौं । यसपटक हाम्रो आशा योभन्दा बढी थियो । यद्यपि यसलाई नराम्रो पनि भन्न मिल्दैन । यसमा हामी मख्ख हुनुहुँदैन । सचेत भएर अघि बढ्नुपर्ने अवस्था छ ।”
