काठमाडौं, असार १ । काठमाडौंको कालिकास्थान स्थित ट्रिनिटी कलेजमा कार्यरत सुरक्षा गार्डमाथि खुकुरी प्रहार गरेको आरोपमा चार जना विद्यार्थीलाई प्रहरीले नियन्त्रणमा लिएको छ ।
सोहि कलेजमा अध्यनरत चार जना विद्यार्थीले मंगलबार दिउँसो साढे १ बजेतिर सुरक्षा गार्डलाई खुकुरी प्रहार गरेका थिए ।
महानगरीय प्रहरी वृत्त सिंहदरबारको प्रहरीले आक्रमणको सुचना पाए लगत्तै घाइते सुरक्षा गार्डलाई उपचारका लागि मोडेल अस्पताल पुर्याएको थियो ।
खुकुरी प्रहारबाट घाईत सुरक्षा गार्ड उपचारपछि डिस्चार्ज भईसकेका छन् । उनको बायाँ कान मुनि चोट लागेको थियो ।
गार्डमाथी आक्रमण गर्ने सोही कलेजका मानविकी संकायमा कक्षा ११ मा अध्ययनरत चार जना विद्यार्थीहरुलाई प्रहरीले नियन्त्रणमा लिएको प्रहरीले जनाएको छ ।
म्याग्दीको बेनी नगरपालिका वीरमुनी घर भई हाल तारकेश्वर नगरपालिका बानियाँटार बस्ने १८ वर्षीय जोसेन बानियाँ, रामेछाप मन्थली नगरपालिका घर भई काठमाडौं डिल्लीबजार बस्ने १८ वर्षीय बिपिन खत्री, ओखलढुङ्गा मानेभञ्याङ्ग घर भई काठमाडौं घट्टेकुलो बस्ने १८ वर्षीय प्रतीक खतिवडा र टोखा बस्ने १८ वर्षीय सञ्जिव भण्डारीलाई प्रहरीले पक्राउ गरेको छ।
