पशुपतिमा शिवताण्डव देखाउन नपाएपछि रिपोर्टर्स क्लबमा नृत्य देखाइयो
काठमाडौं, ८ असार । विश्वभुमि शिवशक्ति सनातन अभियान नेपालले रिपोर्टर्स क्लब नेपालमा आज शिवताण्डव प्रदर्शन गरेको छ ।
आज (आइतबार) क्लब मा पत्रकार सम्मेलन गर्दै धार्मिक गुरु होमबहादुर कार्कीले नेतृत्व गरेको अभियानले पशुपति क्षेत्र विकास कोषले पशुपति क्षेत्रमा शिव ताण्डव नृत्य कार्यक्रम गर्न नदिएपछि क्लबमा नृत्य प्रदर्शन गरेको हो ।
पत्रकार सम्मेलनमा बोल्दै कार्कीले आफुहरुले पशुपति विकास कोषमा शिव ताण्डव नृत्य प्रदर्शनको लागि निवेदन दिएको र बेवास्ता गरेको बताए । यसबारेमा पर्यटन मन्त्रालय, मानव अधिकार सन्जालमा पनि ध्यानाकर्षण गराउने उनको भनाई थियो ।
उनले अख्तियार दुरुपयोग अनुसन्धान आयोगले यसअघिका पशुपति विकास कोषका कोषाध्यक्ष देखि अध्यक्षसम्मका सम्पुर्ण पदाधिकारीहरुको सम्पत्ति छानबिन गर्नुपर्ने माग गरे । उनले भने,‘अब मैले केही दिनमा नै पशुपति विकास कोषका यस अघिका सम्पुर्ण पदाधिकारीहरुको सम्पत्ति छानबिन गर्न अख्तियारमा निवेदन दिनेछु ।’
कार्कीले यस अघि नै पशुपतिमा शिव ताण्डव नृत्य देखाउन खोज्दा आफ्नो टोलीलाई पशुपति विकास कोष कार्यकारीणीले एक छिन पनि समय नदिएको भन्दै विरोध जनाएका थिए । कार्यक्रममा विभिन्न व्यक्तित्वहरुले आफ्नो भनाई राखेका थिए ।
