एजेन्सी, २२ भदौ । मणिरत्नमको ऐतिहासिक ड्रामा फिल्म पोन्नियिन सेल्भान–१ यतिबेला निकै चर्चामा छ । चलचित्रको ट्रेलर सार्वजनिक भएको छ । यस फिल्मको ट्रेलर सार्वजनिक कार्यक्रममा साउथ इन्डस्ट्रीका धेरै सेलिब्रेटीहरु सहभागी भएका थिए ।
यस अवसरमा बलिउड अभिनेत्री ऐश्वर्या रायले सुपरस्टार रजनीकान्तको खुट्टा छोइन्, जसको भिडियो सार्वजनिक भएको छ । यस भिडियोमा ऐश्वर्या कालो सूटमा निकै सुन्दर देखिएकी छिन् । ऐश्वर्याले पहिले फिल्मका निर्देशक मणिरत्नमलाई अँगालो हालिन् र त्यसपछि रजनीकान्तलाई भेटिन् ।
यो फिल्म १०औं शताब्दीमा चोल साम्राज्यको संघर्षको कथामा आधारित छ । यस फिल्ममा ऐश्वर्या राय महत्वपूर्ण भूमिकामा छिन् । ऐश्वर्याले रजनीकान्तसँग फिल्म एन्थिरनमा सँगै काम गरेकी थिइन् ।
यति लामो समयपछि रजनीकान्तसँग भेट्न पाउँदा ऐश्वर्या निकै खुसी देखिएकी छिन् । फिल्मलाई मणिरत्नमले निर्देशन गरेका हुन् । फिल्म ३० सेप्टेम्बरमा रिलिज हुँदैछ ।
