काठमाडौं, भदौ २९ । ११ बजेका लागि बोलाइएको संघीय संसद प्रतिनिधि सभाको बैठक २ घण्टा पछि सरेको छ । संसद भवन नयाँ बानेश्वरमा बैठक दिउँसो १ बजेमात्रै बस्ने भएको संसद सचिवालयले जनाएको छ ।
आजको बैठकमा सभामुखले राष्ट्रपतिको कार्यालयबाट प्राप्त विधेयक प्रमाणीकरण सम्बन्धी पत्र पढेर सुनाउने सम्भावित कार्यसूची रहेको छ । राष्ट्रपति विद्यादेवी भण्डारीले मंगलबार पाँचवटा विधेयक प्रमाणीकरण गरेकी छन् ।
त्यसैगरी बैठकमा कारागार विधेयक, २०७८ माथि राष्ट्रिय सभाबाट भएको संशोधन प्रस्ताव प्रस्तुत गर्ने सम्भावित कार्यसूची रहेको संसद् सचिवालयले जनाएको छ ।
