विनय रावलको पक्षमा बर्दियामा धुलो उड्दै, नायिका सुष्मा कार्कीले धमाकेदार डान्स गर्ने

काठमाडौैं, २६ कार्तिक । मंसिर ४ गतेको निर्वाचन नजिकिएसँगै बर्दिया–२ का राप्रपाका उम्मेदवार विनय रावलको पक्षमा माहोल तातेको छ । पछिल्लो चुनावी प्रचारप्रसारमा पनि रावलको पक्षमा व्यापक जनलहर देखिएको छ । बर्दियाको समग्र विकासमा एजेण्डासहित चुनावी मैदानमा उत्रिएका रावललाई सो क्षेत्रका युवादेखि बृद्धसम्मले रुचाएका छन् ।

समाजसेवाको पाटोबाट समग्र बर्दियाली जनताको मन जितेका रावल यसपटकको निर्वाचनमा मत जितेर सो क्षेत्रको जनताको सेवक बन्न आँतुर छन् । रावल आँफैले आफूलाई नेताभन्दापनि सेवकको रुपमा चित्रण गर्ने गरेका छन् । उनको समाजसेवा लोभलाग्दो छ । बर्दियाको पर्यटन र कृषि क्षेत्रमा विकास गर्ने स्पष्ट खाकासहित रावल चुनावी मैदानमा छन् । रावलप्रतिको क्रेज देखेर पार्टी नेतृत्व पँक्तिले पनि पछिल्लो समय खुशी व्यक्त गर्ने गरेको छ ।

एकपछि अर्को गरेर पछिल्ला दिनमा आयोजित चुनावी सभामा जनता हजारौंको संख्यामा उपस्थिति देखेपछि पशुपतिशमशेर जबरादेखि प्रकाशचन्द्र लोहनीसम्मले रावलको जीत सुनिश्चित् भैसकेको दाबी गर्ने गरेका छन् । आगामी सोमबार अर्थात कार्तिक २८ गते हनुमानगढी, राजापुरमा राप्रपाले बृहत्त पार्टी प्रवेश र चुनावी सभाको आयोजना गर्दैछ ।

रोचक त के छ भने सो सभामा वरिष्ठ नेता डा. लोहनीले सम्बोधन गर्नेदेखि सभामा आयोजित सांस्कृतिक कार्यक्रम पनि धुवाँदार हुने भएको छ । नेपाली चलचित्र जगतकी चलेकी नायिका सुष्मा कार्की रावलको पक्षमा माहोल बनाउनको लागि बर्दिया उत्रिँदैछिन् । सो सभामा हुने सांस्कृतिक कार्यक्रममा नायिका कार्कीले विभिन्न हिट गीतमा आफ्नो नृत्य प्रस्तुत गर्नेछिन् । उनको साथै, चर्चित गायिका रजिना रिमालले पनि प्रस्तुति दिने भएकी छिन् ।

https://www.facebook.com/binay.b.rawal/videos/1267336197445215