काठमाडौं, ८ मंसिर । काठमाडौं ७ का नवनिर्वाचित सांसद गणेश पराजुलीले राष्ट्रिय स्वतन्त्र पार्टीको जितमा आश्चर्य नलागेको बताएका छन् ।
प्राइम टाइम्स टेलिभिजनको ‘जनता जान्न चाहन्छन्’ कार्यक्रमका लागि पत्रकार ऋषि धमलासँग कुरा गर्दै पराजुलीले भने, ‘राष्ट्रिय स्वतन्त्र पार्टीको जित स्वाभाविक हो । यसमा आश्चर्यजनक मान्नुपर्ने कुनै कारढा छैन । नागरिकले अहिले खोजेको कुरा परिवर्तन र समृद्धि हो । यथास्थितिको विकल्पमा सशक्त रुपमा उदाएको पार्टी नै हाम्रो हो । नागरिकको चाहना बुझ्ने पार्टी रास्वपाबाहेक थिएनन् ।’
देशको मुहार परिवर्तनका लागि आफ्नो पार्टीसँग स्पष्ट मार्गचित्र रहेको पनि उनले दाबी गरे । पराजुलीले भने, ‘हाम्रो एजन्डा भनेकै देशको मुहार परिवर्तन हो । यो हामीले कसैको लहैलहैमा लागेर गरेको कुरा होइन । विज्ञसँगको सहकार्यमा हामीले खाका बनाएका छौं । पुरानाले सकेनन् भन्दैमा नयाँले नसक्ने कुरा नै छैन । हामीले पूरा नै नहुने ठूलठूला सपना देखेको पनि छैन । प्रमुख कुरा थिति बसाल्नुपर्छ ।’
निर्वाचनको पूर्ण नतिजा नआईकन सरकारमा जाने वा नजाने स्पष्ट पराजुलीले बताए । उनले भने, ‘सरकारमा नगईकन परिवर्तन र समृद्धि सम्भव हुन्न । निर्वाचन लड्ने भनेकै सरकार बनाउनका लागि हो । त्यसैले सरकारमा जाने वा नजाने भन्ने प्रश्नै उठ्दैन । तर यसबारे हामी निर्वाचनको पूर्ण नतिजा आएपछि मात्र भन्न सक्छौं । कसरी अघि बढ्ने हो भन्ने कुरा उपयुक्त समयमा निर्णय गर्छौं ।’
आफ्नो पार्टीमा रवि लामिछानेको विकल्प रहेको दाबी पनि उनले गरे । पराजुलीले भने, ‘रवि लामिछाने सम्भावनाको बिम्ब हो । आम नागरिकले खोजेको पात्र हो । यसो भन्दै गर्दा हाम्रो पार्टीमा अरु कोही छैनन् भन्न मिल्दैन । हामीले डमी प्रधानमन्त्री खोजेको होइन । मुलुकलाई यथास्थितिको सरकार बनेर हुँदैन, सुशासनको अनुभूति दिने सरकार बन्नुपर्छ ।’
