काठमाडौं, १० माघ । नेपाली कांग्रेसका नेता एवं सांसद प्रदीप पौडेलले आफ्नो पार्टीलाई प्रमुख विपक्षी दलको भूमिका दिन कुनै कानुनी जटिलता नभएको बताएका छन् ।
‘कानुनी रुपमा नेपाली कांग्रेसलाई प्रमुख विपक्षी दलको भूमिका दिन कुनै जटिलता थिएन । तर यहाँ जबर्जस्ती जटिल बनाइयो । विपक्षी दलको भूमिका दिन निवेदन लेख्नु गम्भीर हो भन्ने पनि लाग्दैन । यो बाहिरफेर कुरा गर्नेभन्दा पनि आन्तरिक रुपमा समीक्षा गर्ने विषय हो । पार्टीको केन्द्रीय कार्यसमितिको बैठकमा त्यसबारे छलफल हुन्छ,’ नेपाली रेडियो नेटवर्क (एनआरएन) को कार्यक्रम ‘नेपाली बहस’का लागि पत्रकार ऋषि धमलासँग कुरा गर्दै पौडेलले भने ।
रणनीतिक चातुर्य बनाउन पार्टी चुकेकाले राजकीय पदहरु गुमाउनु परेको पनि उनले औंल्याए । पौडेलले भने, ‘आम निर्वाचनमा हामी पहिलो पार्टी भयौं । त्यस हिसाबले प्रधानमन्त्री दाबी गर्नु त के अनौठो भयो र ? सय प्रतिशत नपाए पनि पार्टीले ४०–६० प्रतिशत लिन सक्नुपर्थ्र्यो । रणनीतिक चातुर्य नभएकाले राजकीय पदहरु पाएनौं । सरकारलाई विश्वासको मत दिइ नै सकियो । अब हामी विपक्ष बेन्चमा बस्छौं, सिर्जनशील प्रतिपक्षको भूमिका निर्वाह गर्छौं ।’
आफूहरु सत्तारोहण गर्न नछटपटिएको दाबी पनि उनले गरे । तर सभामुख, उपसभामुख, राष्ट्रपतिमा उम्मेदवारी दिनु च्याँखे थाप्नु नभएको पनि पौडेलको जिकिर छ । उनले थपे, ‘राष्ट्रपति संविधानको संरक्षक भएर बस्नुपर्ने अभिभावकीय पद हो । त्यसैले अबको राष्ट्रपति नेपाली कांग्रेसको भयो भने बहुरंगी संसदमा पनि सन्तुलन कायम हुन सक्छ । त्यसैले हामीले राष्ट्रपतिमा दाबेदारी प्रस्तुत गर्न चाहेका हौं । यसको अर्थ हामी सत्तारोहण गर्न छटपटिएका छैनौं । संसदीय व्यवस्थामा उम्मेदवारी दिनुलाई च्याँखे थापेको भन्न मिल्दैन ।’
कांग्रेसले राष्ट्रपतिमा साझा पात्र खोज्ने भन्दा पनि आफैं उम्मेदवारी दिने नेता पौडेलले प्रस्ट पारे । उनले भने, ‘सहमतिका आधारमा साझा व्यक्ति आउने स्थिति आयो भने अर्कै कुरा हुन्छ । तर आजको दिनमा कांग्रेसले आफैं उम्मेदवारी दिन्छ ।’ कानुनी रुपमा स्पष्टता नभएको कारण देखाउँदै राष्ट्रपतिको पदावधि लम्बाउन खोजिएको आरोप पनि उनले लगाए ।
साथै उनले पूर्वप्रधानमन्त्री भइसकेको व्यक्ति राष्ट्रपति हुन नमिल्ने पनि दाबी गरे । पौडेलले थपे, ‘राष्ट्रपति कार्यकारी पद होइन । प्रधानमन्त्री भएर शक्तिको अभ्यास गरिसकेको मान्छे राष्ट्रपति हुन सक्दैन । त्यो त अनुशासनमा बस्नुपर्ने आलंकारिक पोजिसन हो । यो कुरा माओवादी केन्द्रले पनि बुझेको हुनुपर्छ ।’
