काठमाडौं, २५ साउन । नेकपा (एकीकृत समाजवादी) का सम्मानित नेता तथा पूर्व प्रधानमन्त्री झलनाथ खनालले आफ्नो पार्टी वैचारिक र संगठानिक रुपमा रुपान्तरण हुन लागेको स्पष्ट पारेका छन् । उनले आफूहरु नीति निर्माणको तहमा पुगेको बताए ।
आफूहरुले गरेको विद्रोहलाई पुष्टि गर्न र संस्थागत गर्न यही वर्षको अन्तिमतिर महाधिवेशन गर्ने तयारी भएको पनि उनको भनाई छ । आज राति प्राइम टिभीबाट प्रसारण भएको जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले अहिले पार्टीमा नेतृत्वको कुरा मुख्य विषय नभएको बताए ।
पार्टी स्थापनाको दुई वर्ष पूरा हुँदै गर्दा आफूहरुबाट थुप्रै कमिकमजोरी भएको उनको स्विकारोक्ति छ । उनले गलत काम गरेको भए जतिसुकै ठूलो पदको व्यक्ति भएपनि छानबिनको दायरामा आउनुपर्ने बताए । नेता खनालले ललिता निवास प्रकरणमा पार्टीका अध्यक्ष माधवकुमार नेपालको संलग्नता देखिए पार्टीले नबचाउने स्पष्ट पारे ।
उनले आफूले गलत गरेको भए हत्कडी लगाउन तयार रहेको भन्दै पार्टी अध्यक्ष माधव नेपालले पनि गलत गरेको भए हत्कडी लगाउन तयार छु भनेर भन्नुपर्ने बताए ।
