न्यूयोर्क (अमेरिका), ८ असोज । न्यूयोर्कको रचेस्टर सोमबार सम्पन्न इन्ट्रा कप युवातर्फ फुटबलमा टिमाई स्क्वायड र भलिबलतर्फ रुकुम टिम विजयी भएका छन् । महिला भलिबलतर्फ पूर्वराष्ट्रिय खेलाडी सिपोरा गुरुङ्ग नेतृत्वको बेलमन्ट क्लब तथा महिला फुटबलमा नर्थ डकोटा राज्यको साइनिङ्ग स्टार विजयी भएका छन्
चालिस वर्षभन्दा माथि उमेर समूह पुरुष भेट्रानतर्फ इन्ट्रा सिन्सिनाटीले जित हात पारेको छ । इन्ट्रा नेशनल वेलफेयर एण्ड सपोर्ट फाउण्डेसन अफ अमेरिकाको आयोजनामा सुरु भएको तेस्रो इन्ट्रा कप फुटबल तथा भलिबल खेलका विजेतालाई फाउण्डेशनका अध्यक्ष डिल्ली अधिकारीले आज एक कार्यक्रमकाबीच नगद पुरस्कारसहित ट्रफी र मेडल प्रदान गरे । उनले खेलका माध्यमबाट नेपालीबीच सामुदायिक एकता र सहकार्यमा जोड दिइएको बताए ।
अमेरिकामा बस्ने नेपाली समुदायकाबीच भएको प्रतिष्पर्धात्मक फुटबल र भलिबल असोज ६ गतेदेखि शुरु भएको थियो । न्यूयोर्क र आसपासका राज्यबाट नेपाली मूलका खेलप्रेमीहरु खेल हेर्न उपस्थित भएको अध्यक्ष अधिकारीले जानकारी दिए । उनका अनुसार प्रतियोगितामा भलिबलतर्फ पुरुषका २४, फुटबलमा युवातर्फ १६ र ४० बर्षमाथिका भेट्रानतर्फ आठ गरी २४ समूहको सहभागिता थियो ।
त्यस्तै, महिलातर्फ भलिबलमा आठ समूहले प्रतिष्पर्धा गरेका थिए भने फुटबलमा तीन समूहको सहभागिता रहेको अध्यक्ष अधिकारीले बताए ।
आयोजक समितिका निर्देशक अरुण गुरुङले दिएको जानकारीअनुसार, प्रतिष्पर्धामा युवा फुटबलतर्फ पथरी फुटबल क्लब दोस्रो भएको थियो भने महिलातर्फ नेब्रास्काको माउन्टेनियर्स क्लब दोस्रो भएको थियो । भेट्रान्स फुटबलतर्फ ह्यारिसवर्ग टिम दोस्रो भयो । भलिबलतर्फ पुरुष समूहमा न्यूयोर्कको मामा भान्जा क्लब उपविजेता बनेको थियो । त्यसैगरी महिला भलिबलतर्फ बाल्टिमोरको बेलमन्ट क्लब उपविजेता भएको थियो ।
अमेरिकामा हुने नेपाली समुदायको सबैभन्दा ठूलो प्रतियोगितामा अमेरिकाका १४ राज्यबाट एकहजारभन्दा बढी खेलाडी सहभागी भएको आयोजक समितिले जनाएको छ । “प्रथम हुने समूहलाई एक सय १५ ग्राम सुन भएको ट्रफी दिइएको थियो”, निर्देशक गुरुङले भने, “यो ट्रफी आफ्नो बनाउनका लागि तीनपटकसम्म प्रतियोगितामा प्रथम हुनुपर्छ ।”
उनका अनुसार युवातर्फको फुटबल विजेतालाई १५ हजार अमेरिकी डलर, दोस्रो हुनेलाई १० हजार र तेस्रो हुनेलाई छ हजार डलर पुरस्कार दिइएको थियो । भलिवलमा पुरुष विजेताले १० हजार, दोस्रोले छ हजार र तेस्रोले चार हजार अमेरिकी डलर प्राप्त गरेका गुरुङले बताए । उनका अनुसार भेट्रानतर्फ फुटबल विजेतालाई १० हजार, दोस्रोलाई छ हजार र तेस्रो हुनेलाई तीन हजार पुरस्कार दिइएको थियो ।
अमेरिकाका भर्मन्ट, पेन्सिलभेनिया, नर्थ क्यारोलिना, न्यूयोर्क, क्यानडा, ओहायो, म्यासाच्युसेट्स, केन्टकी, टेक्सास, क्यालिफोर्निया, जर्जिया, नेब्रास्का, मेरिल्याण्डलगायतका राज्यबाट भेट्रान्सतर्फ हिलसिटी क्लब, रिभाइभल क्लब, एक्रोन इन्ट्रा, न्यूयोर्क भेट्रान्स, इन्ट्रा कोलम्बस र ह्यारिसवर्ग भेट्रान्स प्रतिष्पर्धामा छन् ।
युवातर्फ साङ्ग्रिला युथ फुटबल क्लब, न्यूयोर्क नेपाली फुटबल क्लब, टिमाई स्क्वाड, जुनियर योङ्ग गाइज एघार, पथरी एफसी, एफसी युनाइटेड, वाईएस एफसी, सगरमाथा एफसी, इन्ट्रा एफसी, युनाइटेड ओन्टारियो, भर्मन्ट इलेवेन एफसी, न्यू स्पोर्टिङ्ग एफसी, चुके एफसी, युनिक व्वाइज एफसी, नर्थ क्यारोलिना रोयल एफसी र खुदुनावारी एफ सहभागी थिए ।
भलिबलतर्फ बफेलो न्यूयोर्क, इन्ट्रा ह्वाइट, युके ब्रदर्श इरी, सिराकस बिसी, म्याग्दी समाज, अमेरिका टिम, रुकुम बी, रचेष्टर थन्डर, योङ्ग ब्लड, बागलुङ समाज, एनआरएनए क्यालिफोर्निया–एक र दुई, फिफ्टी स्टार युवा क्लब, द सिटी अफ टालमाजे, युटिआईसीए युथ, रुकुम ए, बेलमन्ट, इयुसिएनसी, मामा भान्जा, ह्वाइट टिम, सिन्धु न्यूयोर्क, सार्लेट सिक्स, इन्ट्रा ब्लू, साजनी टेक्सास, मामा भान्जा ब्ल्यू र एएनकेए केन्टकी समूह सहभागी थिए । रासस
