काठमाडौं,२४ असोज । नेपाली कांग्रेसका महामन्त्री गगन थापाले राष्ट्रिय सर्तकता केन्द्रलाई अख्तियार दुरुपयोग अनुसन्धान आयोग मातहत राख्न प्रस्ताव गरेका छन् ।
बुधबार बसेको प्रतिनिधि सभाअन्तर्गतको राज्य व्यवस्था तथा सुशासन समितिमा अख्तियार दुरूपयोग अनुसन्धान आयोग तेस्रो संशोधन विधेयकमाथिको छलफलमा बोल्दै महामन्त्री तथा प्रतिनिधि सभा सदस्य थानपाले यस्तो बताएका हुन् ।
उनले विभिन्न संवैधानिक निकायमा गरिने नियुक्तिबारे कानूनमै मापदण्ड बनाउनसमेत माग गरेका छन् । थापाले ती विभिन्न् आयोगदेखि अदालतसम्मका नियुक्ति प्रक्रियाहरु दलगत रुपमा हुनेगरेको कारण दलको छायाँ पर्ने गरेको बताए ।
‘नियुक्तिमा दलगत भागबन्डा छ। पछिल्लो समय अदालतले समेत भाग खोजेको छ,’ उनले भने,‘अर्कोतर्फ अख्तियारकै सदस्यलाई अख्तियारले मुद्दा लगाउनुपर्ने अवस्था छ, त्यसैले नियुक्तिको मापदण्ड बनाउनुपर्छ।’
