काठमाडौं । नेकपा एमालेका अध्यक्ष केपी शर्मा ओलीले देशमा बढेको निराशाको मौका छोपेर प्रतिक्रियावादीहरू दुलोबाट निस्केर राजा बन्ने सपना देखे पनि त्यो कहिल्यै पुरा नहुने बताएका छन् ।
पार्टीले शुरू भएको ‘झुलाघाट–चिवाभञ्ज्याङः समृद्धिका लागि सङ्कल्प यात्रा’को क्रममा बैतडीको गोठालपानीमा आयोजित आमसभालाई सम्बोधन गर्दै पूर्वप्रधानमन्त्री समेत रहेका अध्यक्ष ओलीले देशमा कुनै पनि हालतमा प्रतिगमन सफल हुन नसक्ने बताएका हुन् ।
गठबन्धन सरकारको हुतिहारा प्रवृतिका कारण जनतामा अन्योल र निराशा बढ्दै गएको हुनाले अहिले प्रतिक्रियावादी शक्तिहरू दुलोबाट बाहिर निस्कने प्रयास गरिरहेको बताउँदै अध्यक्ष ओलीले भने–‘उनीहरूको यो दिवास्वप्न कुनै पनि हालतमा पुरा हुन्न’ ।
पूर्वी नेपालमा पहिचानका नाममा देखिएको असन्तुष्टिप्रति सङ्केत गर्दै अध्यक्ष ओलीले देशको एकतालाई खलल पार्ने खालका कुराले समाजमा बेमेल बाहेक केही नहुने बताए ।
पहिचानको सवालमा एमाले सबैभन्दा बढी पक्षपाती र हरेक क्षेत्र, वर्ग, लिङ्ग, जातजातिको पहिचानको संवैधानिक र कानुनी व्यवस्था गर्ने पार्टी पनि एमाले भएको चर्चा गर्दै अध्यक्ष ओलीले भने– पहिचानको राजनीति भनेको अरुलाई घृणा गर्ने, हिंसा गर्ने, जनताको भावनामा चोट पुर्याउने, देश विभाजन गर्ने, समाजमा एकता खल्बल्याउने कुरा हो ।
देशमा अहिले लोकतन्त्रको अभ्यास सहि रूपमा नभएको भन्दै उनले सरकारकै कारण देशमा अराजकता, कमिशनको खेल भइरहेको भनाइ राखे । शहीद दशरथचन्दको जिल्ला बैतडीका समस्या आफूले बुझेको र यहाँ शहीदको राष्ट्रिय प्रतिष्ठान निर्माण गर्नुपर्ने विषयमा हाम्रो ध्यान गएको अध्यक्ष ओलीले बताए ।
बैतडीमा विकासका काम अघि बढाउन एमाले सकारात्मक रहेको र यहाँका जनताले झुलाघाटमा पक्की पुल नहुँदा भोग्नुपरेको समस्या आफूहरूले बुझेरै सरकारमा रहेको समयमा तुईन विस्थापित गर्नका लागि भारतको उत्तराखण्डका मुख्यमन्त्री, प्रधानमन्त्री नरेन्द्र मोदीसँग कुरा गरेर दुवैतर्फको मध्यभागमा पुल निर्माणको सहमति गरेको उनले स्मरण गरे ।
नेकपा एमालेले सरकारको नेतृृत्व गरिरहेको समयमा देशमा समृद्धिको आशा पलाएको स्मरण गर्दै अध्यक्ष ओलीले भने– महाकाली, सेती कोरिडोर, पूर्वपश्चिम मदन भण्डारी राजमार्ग, हुलाकी राजमार्ग लगायत भौतिक पूर्वाधार निर्माणका सयौं कामहरू अघि बढायौं । भूकम्पले भत्काएका नौलाख घरहरू, बारा जिल्लामा आँधीहुरीले उडाएका ८६९ घरहरूको पुनः निर्माणको काम एमालेले सम्पन्न गर्यो ।
वर्तमान गठबन्धन सरकारले कमिशन र तस्करीलाई प्रोत्साहन गर्नुका साथै जनतामा निराशा बढाएको उनको भनाइ छ । अध्यक्ष ओलीले भने– नेपाली जनताको राष्ट्रिय आकाङ्क्षा र एमालेको गन्तव्य ‘समृद्ध नेपाल, सुखी नेपाली’लाई साकार पार्ने उद्देश्यका साथ आजबाट पुष्पलाल मध्यपहाडी लोकमार्गमा शुरु गरेको अभियानमा देखिएको उत्साहपूर्ण साथ र सहयोग, एमालेप्रतिको विश्वासले मलाई हर्ष लागेको छ ।
अध्यक्ष ओली लगायतका नेताहरूले बैतडीको खोड्पेमा बझाङका कलाकारद्वारा प्रस्तुत डेउडा गीत तथा नृत्य अवलोकन गरेका थिए।
