काठमाडौं, २१ माघ । नेकपा (एमाले)का अध्यक्ष केपी शर्मा ओलीले अहिलेको गठबन्धन सरकार जबरजस्ती जोरजाम गरेर बनाइएको बताएका छन् । अध्यक्ष ओलीले देशको समृद्धि र स्थिरताका लागि यस्तो गठबन्धन संस्कृति अन्त्य गर्नुपर्ने बताए ।
नेकपा (एमाले) काठमाडौं जिल्ला कमिटीले हिजो (शनिबार) टुँडिखेलमा आयोजना गरेको युवा महोत्सव–२०८० को उद्घाटन गर्दै अध्यक्ष ओलीले गठबन्धन संस्कृति देशको विकास र समृद्धिका लागि घातक भएको बताए । उनले ०८४ को निर्वाचनबाट गठबन्धन संस्कृति अन्त्य हुने विश्वास व्यक्त गरेका हुन् ।
राणा शासन, पञ्चायत तथा राजतन्त्र समेत फालेर आएका नेपाली जनतालाई गठबन्धन मिल्काउन पनि समय नलाग्ने उनले बताए । २०८४ को निर्वाचनबाट जनताले गठबन्धन मिल्काइदिने बताउँदै अध्यक्ष ओलीले भने–‘हामीले अधिनायकवाद, तानाशाह, राजतन्त्र, पञ्चायत सबै फ्याक्यौँ भने यो जोरजाम गरेर बनाएको गठबन्धन कुनै ठुलो कुरै होइन ।’ file photo
