काठमाडौं, १२ वैशाख । पूर्व–पश्चिम राजमार्ग अन्तर्गत झापाको झिलझिलेमा आज बिहान दुर्घटना हुँदा तीन जनाको मृत्यु भएको छ। बिहान करिब साढे पाँच बजेको समयमा दमकबाट सुरुङ्गातर्फ आउँदै गरेको मोटरसाइकल र बिपरित दिशाबाट जाँदै गरेको बोलेरो जीप एक आपसमा ठक्कर खाँदा शिवसताक्षी–८ स्थित झिलझिलेमा सो दुर्घटना भएको हो ।
मोटरसाइकलमा सवार तीन जनामध्ये दुईजनाको घटनास्थलमै र एकजनालाई बीएण्डसी अस्पताल बिर्तामोड लैजाँदै गर्दा मृत्यु भएको जनाइएको छ ।
मृतकको नाम थर वतन खुल्न सकेको छैन । दुईजना अन्दाजी २५ वर्षका र एकजना १६ वर्षको रहेको प्रहरीले जनाएको छ । बोलेरो जीप र चालक मेचीनगर ६ बस्ने ४५ वर्षीय ऋषिराज गिरीलाई इलाका प्रहरी कार्यालय झिलझिलेले नियन्त्रणमा लिएको छ । प्रहरीका अनुसार मोटरसाइकल चालकले बिना हेल्मेट मोटरसाइकल चलाइरहेका थिए ।
